قر ۇلتتىق مۋزەيىندە «عاسىرلار قويناۋىنان سىر شەرتكەن قازاقستان» جوباسى اياسىندا باتىس قازاقستان وبلىستىق تاريحي-ولكەتانۋ مۋزەيىنىڭ «تاريحى تەرەڭ اق جايىق» اتتى كورمەسى ءوز جۇمىسىن باستادى.
كورمە باتىس قازاقستان وبلىستىق مۋزەي قورلارى ارقىلى استانا تۇرعىندارى مەن قوناقتارىنا اق جايىق ءوڭىرىنىڭ ماتەريالدىق جانە رۋحاني مادەنيەتىنىڭ باعا جەتپەس قۇندىلىقتارىن كورسەتۋدى جانە ولكە تاريحىمەن تەرەڭىرەك تانىستىرۋدى كوزدەيدى.كورمەگە ارحەولوگيالىق قازبا جۇمىستارى كەزىندە تابىلعان ءۇشبۇرىش، شىرشا، رومب ورنەكتى قىش، شىعىر قۇمىرالار، جايىق قالاشىعىنىڭ ورنىنان تابىلعان كەسەنە قالدىقتارى جانە كىرپىش تاستار قويىلادى. سونىمەن قاتار ەكسپوزيتسيالاردىڭ قاتارىندا ب.د.د ءۇى-ءۇ عاسىرلارعا تيەسىلى تاقساي وبا-كەشەنىنەن 2012 جىلى (بقو تەرەكتى اۋدانى، دوليننوە ەلدى-مەكەنى) تابىلعان «التىن حانشايىمنىڭ» جاڭعىرتىلعان نۇسقاسى، ەجەلگى سارمات كەزەڭىنە جاتاتىن اقسۇيەك ايەل جەرلەنگەن جەردىڭ ورتەنگەن اعاش بورەنەلەرى، عۇرىپتىق ىدىستار قويىلدى.جيىندا ءسوز العان ۇلتتىق مۋزەيدىڭ ديرەكتورى دارحان مىڭبايدىڭ ايتۋىنشا، مۇنداي شارالار ءجيى وتكىزىلىپ تۇرۋى قاجەت. ول جاستاردى ۇلتىن، تاريحىن، مادەنيەتىن سۇيۋگە تاربيەلەيدى. «ءبىز ۇلتتىق مۋزەيدىڭ ۋاقىتشا كورمەلەر زالىن ءار وبلىسقا ەكى ايعا بەرىپ وتىرامىز. بۇعان دەيىن پاۆلودار، اتىراۋ، قاراعاندى قالالارىنىڭ تاريحي جادىگەرلەرىنىڭ كورمەسىن ۇيىمداستىردىق. مۇنداي كورمەلەر ءوزىمىزدى-ءوزىمىز تانۋىمىز ءۇشىن كەرەك. قازىر كوپ جاستار شەتەلگە شىعىپ جاتىر. بىراق كوپشىلىگى ءوز تاريحىنان، مادەنيەتىنەن بەيحابار. جاستاردى جەرگىلىكتى جەرگە بولىنبەي، ۇلتتىق پاتريوتيزمگە تاربيەلەۋ كەرەك. بقو تاريحقا تولى ەلدىمەكەن. باسقاسىن ايتپاعاندا، وبلىستان تابىلعان «التىن حانشايىم» الەم دەڭگەيىندەگى جادىگەر بولىپ سانالدى. ول قازاقتى جاھانعا تانىتتى»، - دەدى ول
.
فاتيما حانىمنىڭ 1824 جىلى سانكت-پەتەربوردا بالعا كيگەن كويلەگىنىڭ كوشىرمەسى
جاڭگىر حان ءمۋنديرىنىڭ كوشىرمەسى
كوپشىلىك كۇيشى-كومپوزيتور دينا نۇرپەيىسوۆانىڭ قامزولىن، كۇيشى ق.جانتىلەۋوۆتىڭ شاپانى مەن دومبىراسىن، اق جايىقتى مەكەن ەتەتىن وزگە ۇلت وكىلدەرىنىڭ ۇلتتىق كيىمدەرى مەن مۋزىكالىق اسپاپتارىن، ءا. قاستەەۆتىڭ 1941 جىلى سالعان «قىز جىبەك پەن تولەگەننىڭ كەزدەسۋى» اتتى گرافيكاسىن جانە قازاق ارۋلارى قولدانعان زەرگەرلىك بۇيىمداردى تاماشالاي الادى.
دينا نۇرپەيىسوۆانىڭ قامزولى
بۇعان قوسا كوپشىلىككە 1969 جىلى سانتاس جونىنداعى وبالاردان تابىلعان قىپشاق جاۋىنگەرىنىڭ مۇردەسى، قىپشاق جاۋىنگەرىنىڭ قارۋ-جاراقتارى، ە.پۋگاچەۆ بۇلىگىن باسۋعا قاتىسۋشىلارعا 1775 جىلى ورىس پاتشايىمى ءىى ەكاتەرينا سىي رەتىندە بەرگەن قولعاپ، ورىس اقىنى ا. پۋشكين كيگەن كيىمنىڭ كوشىرمەسى ۇسىنىلادى
.
جۇبان مولداعاليەۆتىڭ جازۋ قۇرالدارى
كورمەنى باتىس قازاقستان وبلىستىق اكىمدىگىنىڭ قولداۋىمەن قر ۇلتتىق مۋزەيى، باتىس قازاقستان وبلىسىنىڭ مادەنيەت، مۇراعاتتار جانە قۇجاتتاما باسقارماسى مەن وبلىستىق تاريحي-ولكەتانۋ مۋزەيى ۇيىمداستىردى. ايتا كەتەيىك، كورمە 2015 جىلعى 18 قاراشادان 2016 جىلعى 18 قاڭتارعا دەيىن جالعاسادى.
نازەركە سۇيىندىكوۆا،
