ءبىر شاكىرت “بەلگىلى برەندتەردىڭ كوشىرمەلەرىن (پوددەلكا) ساتىپ الۋدىڭ، سونداي نارسەلەردى كيۋدىڭ ۇكىمى قالاي بولادى؟”- دەپ سۇرادى.
وسى زاماندا برەند، ماركانىڭ بولماعان جەرى جوق. كيىم، كولىك، جيھاز، تەلەفون، تەحنيكا، حيميا، كومپيۋتەر باعدارلامالارى، قۇرىلىس زاتتارى، قوناقۇي، ۇشاق، ءتىپتى كەيبىر ادامدار وزدەرىن برەند رەتىندە قابىلدايدى. جانە سول برەندتى قالىپتاستىرۋمەن جارنامالاۋ ءۇشىن قىرۋار قاراجات جانە ۋاقىتىن جۇمسايدى.
بۇنىڭ ناتيجەسىندە ول برەندتەر تاۋار بەلگىلەرىنە، اۆتورلىق قۇقىققا ت.ب. مۇلىكتىك قۇقىقتارعا يە بولادى. ياعني ول برەندتا بىرەۋدىڭ مال-مۇلكى بولىپ ەسەپتەلەدى.
سوندىقتان قازىرگى يسلام عۇلامالارى سونداي برەندتەردىڭ كوشىرمەلەرىن (پوددەلكا) ساتۋعا، ساتىپ الۋعا، پايدالانۋعا، كيۋگە تيىم سالعان. سەبەبى، قۇل اقىسىن جەۋ بولىپ ەسەپتەيدى.
قۇل اقىسىن جەۋ بولسا، سول اقىنىڭ يەسى كەشىرمەيىنشە قۇدايدىڭ ءوزى كەشىرمەيتىن كۇنا بولىپ ەسەپتەلەدى!
ال سونداي كيىممەن ناماز وقۋ ماكرۇھ دەيدى قازىرگى ءدىن عالىمدارى.
بىلە تۇرا، وريگينال بولماعان زاتتى وريگينال دەپ ساتۋ مۇلدە حارام ەكەن.
كەيبىر باتىس ەلدەرىندە وريگينال ەمەس، كوشىرمە تاۋارلارمەن ۇستالعان ادامعا ايىپپۇل سالىنادى ەكەن.
تەولوگ اسقار سابدين
