ەجەلگى تاراز قالاشىعىن قازۋ ناتيجەسىندە 97 التىن جانە كۇمىس زاتتار تابىلدى. «ەجەلگى تاراز ەسكەرتكىشتەرى» مەملەكەتتىك تاريحي-مادەني قورىق-مۇراجايىنىڭ ديرەكتورى، تانىمال جامبىلدىق تاريحشى تاكەن مولداقىنوۆ وسى ءبىر جۇمىستاردىڭ باسى-قاسىندا بولىپ، قازاق حاندىعىنىڭ 550 جىلدىعى قارساڭىندا ۇلكەن ولجاعا كەنەلدى.
«ەجەلگى قالاشىقتى قازۋ اۋماعىندا 2,5 مەتر تەرەڭدىكتەن «قازارحەولوگيا» جشس جۇمىسشىلارى 97 قىمبات زاتتار سالىنعان قىش قۇمىرا تاۋىپ الدى، – دەپ اڭگىمەلەدى ت.مولداقىنوۆ. - بۇلار نەگىزىنەن ايەلدەر اشەكەيلەرى، سىرعا، القالار، ايەلدەر قامزولدارىن اشەكەيلەيتىن ۇساق مەتالدار، قۇيمالار، سونداي-اق ۇلكەن بىلەزىكتەر. ەكى التىن جانە التى كۇمىس بىلەزىك قىمبات تاستارمەن بەزەندىرىلگەن».
ت.مولداقىنوۆتىڭ ايتۋىنشا، بارلىق تابىلعان زاتتار مۇقيات ەسەپتەلىپ، سۋرەتكە ءتۇسىرىلىپ الىنعان جانە قۇجاتتالعان. «ءسىرا، بۇل جاسىرىلىپ كومىلگەن قازىنا بولسا كەرەك. قۇمىرا جارىلىپ، بۇلىنگەن، بىراق ىشىندەگى زاتتارى ساقتالىپ قالعان»، – دەپ ءتۇسىندىردى تاريحشى، ونىڭ پىكىرىنشە، تابىلعان ولجا ءحىى عاسىرداعى قاراحانيدتەر داۋىرىنە جاتاتىن بولۋى مۇمكىن، بۇل ەجەلگى تارازدىڭ گۇلدەنگەن كەزى. قازىر ولجا الماتىدا زەرتحانالىق زەرتتەۋدەن وتكىزىلۋدە.
سونىمەن قاتار قالاشىقتى قازۋدا ۇلكەن ەجەلگى ىدىستار دا تابىلعان. تارازدا ساز توپىراقتى جىنىستار مول، بۇل اسىرەسە قىش ىدىستار جاساۋدا وتە باعالى. سوندىقتان دا مۇندا قىشتان كوپتەگەن زاتتار جاسالعان. تابىلعان جادىگەرلىكتەر جاڭعىرتىلىپ، جاڭا «ەجەلگى تاراز» مۇراجايىنان لايىقتى ورىن الماق. ەڭ باستىسى، تابىلعان ەجەلگى قالا عيماراتتارىنىڭ ىرگەتاسى مەن قابىرعالارى ۇلى جىبەك جولى بويىندا دامىعان قالا ءومىر سۇرگەنىن دالەلدەيدى، بۇل تۋرالى تاريحي قۇجاتتار دا بار»، – دەيدى تاكەن مولداقىنوۆ.
ەسكە سالا كەتەيىك، تارازدا قازاق حاندىعىنىڭ 550 جىلدىعىن مەرەكەلەۋ كەزىندە رەسپۋبليكالىق ماڭىزداعى تاريحي ەسكەرتكىش – «ەجەلگى تاراز» ارحەولوگيالىق پاركى اشىلدى، ونىڭ اۋماعىندا باقىلاۋ مۇناراسى، «تاراز سازدارى» ستەلاسى، «مىڭبۇلاق» گۇلزارى ورنالاسقان. «ەجەلگى تاراز» پاركى وبلىستىڭ حالىقارالىق تۋريستىك برەندى بولماق، بۇل نىسان ەكسپو-2017 بۇكىلالەمدىك كورمەسىنە كەلەتىن قوناقتار بولاتىن ورىندار قاتارىنا ەنگىزىلدى.
«ەجەلگى تاراز ەسكەرتكىشتەرى» مەملەكەتتىك تاريحي-مادەني قورىق-مۇراجايى 1998 جىلدان باستاپ جۇمىسىن جۇرگىزىپ كەلەدى. تاراز وبلىسى بويىنشا 1064 تاريحي-مادەني مۇرا بار. قورىق-مۇراجاي — تاريحي-مادەني مۇرالاردى قورعاۋ، جوندەۋ، زەرتتەۋ، قالپىنا كەلتىرۋ جانە پايدالانۋ جۇمىستارىن جۇرگىزەدى. ونىڭ 29 — رەسپۋبليكالىق دارەجەدە، 66 — جەرگىلىكتى ءمانى بار نىساندار.
