Ejelgi Taraz qalashyǵyn qazý nátıjesinde 97 altyn jáne kúmis zattar tabyldy. «Ejelgi Taraz eskertkishteri» memlekettik tarıhı-mádenı qoryq-murajaıynyń dırektory, tanymal jambyldyq tarıhshy Táken Moldaqynov osy bir jumystardyń basy-qasynda bolyp, Qazaq handyǵynyń 550 jyldyǵy qarsańynda úlken oljaǵa keneldi.
«Ejelgi qalashyqty qazý aýmaǵynda 2,5 metr tereńdikten «Qazarheologııa» JShS jumysshylary 97 qymbat zattar salynǵan qysh qumyra taýyp aldy, – dep áńgimeledi T.Moldaqynov. - Bular negizinen áıelder áshekeıleri, syrǵa, alqalar, áıelder qamzoldaryn áshekeıleıtin usaq metaldar, quımalar, sondaı-aq úlken bilezikter. Eki altyn jáne alty kúmis bilezik qymbat tastarmen bezendirilgen».
T.Moldaqynovtyń aıtýynsha, barlyq tabylǵan zattar muqııat eseptelip, sýretke túsirilip alynǵan jáne qujattalǵan. «Sirá, bul jasyrylyp kómilgen qazyna bolsa kerek. Qumyra jarylyp, búlingen, biraq ishindegi zattary saqtalyp qalǵan», – dep túsindirdi tarıhshy, onyń pikirinshe, tabylǵan olja HII ǵasyrdaǵy Qarahanıdter dáýirine jatatyn bolýy múmkin, bul ejelgi Tarazdyń gúldengen kezi. Qazir olja Almatyda zerthanalyq zertteýden ótkizilýde.
Sonymen qatar qalashyqty qazýda úlken ejelgi ydystar da tabylǵan. Tarazda saz topyraqty jynystar mol, bul ásirese qysh ydystar jasaýda óte baǵaly. Sondyqtan da munda qyshtan kóptegen zattar jasalǵan. Tabylǵan jádigerlikter jańǵyrtylyp, jańa «Ejelgi Taraz» murajaıynan laıyqty oryn almaq. Eń bastysy, tabylǵan ejelgi qala ǵımarattarynyń irgetasy men qabyrǵalary Uly Jibek joly boıynda damyǵan qala ómir súrgenin dáleldeıdi, bul týraly tarıhı qujattar da bar», – deıdi Táken Moldaqynov.
Eske sala keteıik, Tarazda Qazaq handyǵynyń 550 jyldyǵyn merekeleý kezinde respýblıkalyq mańyzdaǵy tarıhı eskertkish – «Ejelgi Taraz» arheologııalyq parki ashyldy, onyń aýmaǵynda baqylaý munarasy, «Taraz sazdary» stelasy, «Myńbulaq» gúlzary ornalasqan. «Ejelgi Taraz» parki oblystyń halyqaralyq týrıstik brendi bolmaq, bul nysan EKSPO-2017 Búkilálemdik kórmesine keletin qonaqtar bolatyn oryndar qataryna engizildi.
«Ejelgi Taraz eskertkishteri» memlekettik tarıhı-mádenı qoryq-murajaıy 1998 jyldan bastap jumysyn júrgizip keledi. Taraz oblysy boıynsha 1064 tarıhı-mádenı mura bar. Qoryq-murajaı — tarıhı-mádenı muralardy qorǵaý, jóndeý, zertteý, qalpyna keltirý jáne paıdalaný jumystaryn júrgizedi. Onyń 29 — respýblıkalyq dárejede, 66 — jergilikti máni bar nysandar.
