اباي قۇنانباەۆتىڭ باكىسى 23 مىڭ دوللارعا ساۋدالانىپ جاتىر

2401
Adyrna.kz Telegram

 سەمەي تۇرعىنى اباي قۇنانبايۇلىنىڭ باكىسى 23 مىڭ دوللارعا ساتپاق. يسلام جۇماتاەۆتىڭ ايتۋىنشا، ۇلى اقىن كەزىندە بۇل پىشاقتى ونىڭ اتاسىنا سىيلاعان ەكەن. بىراق مۇنى اۋىزشا ايتقانىمەن، قاريانىڭ قولىندا ناقتى دالەل جوق. ال جەرگىلىكتى مۇراجاي ماماندارى قانشاما دەرەك كوزدەرىن اقتارىپ كورگەنىمەن، وعان قاتىستى مالىمەت تابا الماعان.  

1890 جىلدارى اباي ەلىن قاتتى جۇت جايلاپتى. سول كەزدە ءۇيىر جىلقىنى امان الىپ قالۋ ءۇشىن مەيرامعالي دەگەن بايدىڭ قىستاۋىندا ءبىر جىل وتىرعان ەكەن. باكى سول بايدىڭ بالاسىنا سىيعا تارتىلعان كورىنەدى. ەندى اقساقال اۋلەتتە ءبىر عاسىردان اسا ۋاقىت بويى ساقتالىپ كەلگەن قۇندى زاتتى ساتۋعا بەكىنىپ وتىر. 

يسلام جۇماتاەۆ، سەمەي قالاسىنىڭ تۇرعىنى:

-تەككە بەرمەيمىن. 23 مىڭ دوللار اقشا. ماعان سول ۇيىمە جەتپەگەن اقشاعا جىگىتتەر كومەكتەسسە، سول ادامعا بەرەمىن. سونشاما جىل ساقتاپ كەلىپ، ەشكىمگە تەگىن بەرمەيمىن. باكى جەزبەن كومكەرىلىپ، مۇسىلمانشا بەزەندىرىلگەن. ءجۇزى ءالى ءبىر رەت تە قايرالماپتى. ال جەرگىلىكتى مۇراجاي ماماندارى كەزىندە اباي ەلىن جۇت جايلاپ كوشكەنىن راستاعانىمەن، باكىنى سىيعا تارتقانى جونىندە ەشقانداي دەرەك تاپپاعان.

مەيرامگۇل قايرامباەۆا، اباي قورىق-مۇراجايى ديرەكتورىنىڭ ورىنباسارى:

-ءبىزدىڭ مۇراجاي قورىندا ساقتالعان ەستەلىكتەر مەن ۇرپاقتارىنىڭ جازبالارىنىڭ ەشقايسىندا وسىنداي زاتتى اباي بىرەۋگە سىيعا تارتتى دەگەن دەرەك جوق. مۇمكىن، ءالى ىزدەۋ كەرەك شىعار. سوندا مالىمەتتىڭ تابىلىپ قالۋى دا عاجاپ ەمەس. بىراق بۇگىنگى كۇنگە دالەلدەمە نەگىزى وتە از بولىپ تۇر.اقساقالدان باكىنى ساتىپ الماق تۇگىلى مۇراجايعا تەگىن وتكىزەمىن دەسە دە، ماماندار قابىلدامايمىز دەپ وتىر. سەبەبى، ول ارنايى تەكسەرىستەن وتپەگەن جانە باكىگە قاتىستى ەشقانداي ناقتى دالەل جوق. ال ونى تەكسەرىستەن وتكىزۋ قوماقتى قاراجاتتى تالاپ ەتەدى. ونداي اقشا اقساقالدىڭ دا جانە مۇراجاي قىزىمەتكەرلەرىنىڭ قولىندا جوق.اقساقال باكىنى 2009 جىلى الماتىداعى ءابىلحان قاستەەۆ مۇراجايى مەن مادەنيەت مينيسترلىگىنە دە اپارىپ كورسەتكەن. ولار تەك بۇل زاتتى شەت جاققا اسىرماۋدى ءوتىنىپتى. ەندى تاريحي زاتتى ەلىمىزدە ساتىپ الۋشى تابىلماعان جاعدايدا يسلام جۇماتاەۆ، ونى ينتەرنەت ارقىلى اۋكتسيونعا شىعارماق نيەتتە.  


كتك تەلەارناسى

پىكىرلەر