Semeı turǵyny Abaı Qunanbaıulynyń bákisi 23 myń dollarǵa satpaq. Islam Jumataevtyń aıtýynsha, uly aqyn kezinde bul pyshaqty onyń atasyna syılaǵan eken. Biraq muny aýyzsha aıtqanymen, qarııanyń qolynda naqty dálel joq. Al jergilikti murajaı mamandary qanshama derek kózderin aqtaryp kórgenimen, oǵan qatysty málimet taba almaǵan.
1890 jyldary Abaı elin qatty jut jaılapty. Sol kezde úıir jylqyny aman alyp qalý úshin Meıramǵalı degen baıdyń qystaýynda bir jyl otyrǵan eken. Báki sol baıdyń balasyna syıǵa tartylǵan kórinedi. Endi aqsaqal áýlette bir ǵasyrdan asa ýaqyt boıy saqtalyp kelgen qundy zatty satýǵa bekinip otyr.
Islam Jumataev, Semeı qalasynyń turǵyny:
-Tekke bermeımin. 23 myń dollar aqsha. Maǵan sol úıime jetpegen aqshaǵa jigitter kómektesse, sol adamǵa beremin. Sonshama jyl saqtap kelip, eshkimge tegin bermeımin. Báki jezben kómkerilip, musylmansha bezendirilgen. Júzi áli bir ret te qaıralmapty. Al jergilikti murajaı mamandary kezinde Abaı elin jut jaılap kóshkenin rastaǵanymen, bákini syıǵa tartqany jóninde eshqandaı derek tappaǵan.
Meıramgúl Qaırambaeva, Abaı qoryq-murajaıy dırektorynyń orynbasary:
-Bizdiń murajaı qorynda saqtalǵan estelikter men urpaqtarynyń jazbalarynyń eshqaısynda osyndaı zatty Abaı bireýge syıǵa tartty degen derek joq. Múmkin, áli izdeý kerek shyǵar. Sonda málimettiń tabylyp qalýy da ǵajap emes. Biraq búgingi kúnge dáleldeme negizi óte az bolyp tur.Aqsaqaldan bákini satyp almaq túgili murajaıǵa tegin ótkizemin dese de, mamandar qabyldamaımyz dep otyr. Sebebi, ol arnaıy tekseristen ótpegen jáne bákige qatysty eshqandaı naqty dálel joq. Al ony tekseristen ótkizý qomaqty qarajatty talap etedi. Ondaı aqsha aqsaqaldyń da jáne murajaı qyzymetkerleriniń qolynda joq.Aqsaqal bákini 2009 jyly Almatydaǵy Ábilhan Qasteev murajaıy men Mádenıet mınıstrligine de aparyp kórsetken. Olar tek bul zatty shet jaqqa asyrmaýdy ótinipti. Endi tarıhı zatty elimizde satyp alýshy tabylmaǵan jaǵdaıda Islam Jumataev, ony ınternet arqyly aýkıonǵa shyǵarmaq nıette.
KTK telearnasy
