موڭكە ءبيدىڭ بالا كەزىندە ءبىر باي جوق سۇراۋ ءۇشىن كوش الدىندا كەلە جاتىپ، اۋىلدىڭ جانىندا اسىق ويناپ جاتقان ءبىر توپ بالاعا جولىعىپتى. بالالاردىڭ ءبىرى بايدىڭ اتىن ۇركىتەدى. وعان باي اشۋلانىپ، الگى بالانى قۋالايدى. بايدىڭ مىنگەنى اساۋ بايتال ەكەن، بالانىڭ جەلبىرەگەن كويلەگىنەن ۇركىپ موڭكيدى. موڭكىپ جۇرگەندە بايدىڭ باسىنان بوركى ۇشىپ تۇسەدى. بايتال ودان بەتەر تۋلاپ، بايدى جىعىپ كەتەدى، باي قازا تابادى. سونان كەيىن بايدىڭ تۋمالارى جانە ەلىنىڭ يگى جاقسىلارى جينالىپ كەلىپ، بالالاردىڭ ەلىنەن قۇن سۇرايدى.
ەكى ەل كەلىسە الماي، كەڭەس بىرنەشە كۇنگە سوزىلادى. موڭكە سول اۋىلدىڭ بالاسى ەكەن، جينالعان كوپكە كەلىپ، موڭكە بالا بىلاي دەپتى: «ءيا، اعالار-بيلەر، سىزدەر بۇل كەڭەستى تىم ۇزاققا سوزدىڭىزدار عوي جانە ءبىر شەشىمگە كەلە المادىڭىزدار. وسىنىڭ بيلىگىن ماعان بەرسەڭىزدەر، مەن تەز بىتىرەر ەدىم»، – دەپتى. كوپشىلىك بالانىڭ ىقىلاسىنا ريزا بولىپ، ءبىراۋىزدان: «بيلىكتى بەردىك، ال ايتا عوي»، – دەسىپتى. سوندا موڭكە بالا بىلاي دەپتى: «بۇل شالدىڭ ولىمىنە كىنالى ەل ەمەس، تەنتەك. ال مۇندا تەنتەك – تورتەۋ. مەنىڭشە، سول ءتورت تەنتەك قۇندى ءبولىپ تولەيتىن بولسىن جانە ەردىڭ قۇنى ءجۇز جىلقى بولسىن»، – دەپتى. سوندا موڭكە بالا: «ءبىرىنشى، مىڭ جىلقىدان ءبىر جۋاس ات تابا الماعانداي، اساۋ بايتالعا مىنگەن جانە ەلدە ادام قۇرىعانداي اسىق ويناعان بالالاردان ءجون سۇراعان باي تەنتەك; ەكىنشى، ادام كورمەي جۇرگەندەي، بالادان ۇركىپ تۋلاپ، بايدى جىعىپ ولتىرگەن بايتال تەنتەك; ءۇشىنشى، ۇشىپ تۇسكەن بورىك تەنتەك; ءتورتىنشى بايتالدى ۇركىتكەن بالا تەنتەك. مىنەكي، وسى تورتەۋ قۇندى ءبولىپ تولەيتىن بولسىن»، – دەپتى. وسى بيلىككە ەكى جاعى دا رازى بولىپ، بالالاردىڭ اۋىلى قۇننىڭ ءتورت بولىگىنىڭ ءبىرى – جيىرما بەس جىلقى تولەپ قۇتىلىپتى. موڭكە بالانىڭ بي بولۋىنا وسى بيلىك باستى سەبەپ بولىپتى.
