Móńke bıdiń bala kezinde bir baı joq suraý úshin kósh aldynda kele jatyp, aýyldyń janynda asyq oınap jatqan bir top balaǵa jolyǵypty. Balalardyń biri baıdyń atyn úrkitedi. Oǵan baı ashýlanyp, álgi balany qýalaıdy. Baıdyń mingeni asaý baıtal eken, balanyń jelbiregen kóıleginen úrkip móńkıdi. Móńkip júrgende baıdyń basynan bórki ushyp túsedi. Baıtal odan beter týlap, baıdy jyǵyp ketedi, baı qaza tabady. Sonan keıin baıdyń týmalary jáne eliniń ıgi jaqsylary jınalyp kelip, balalardyń elinen qun suraıdy.
Eki el kelise almaı, keńes birneshe kúnge sozylady. Móńke sol aýyldyń balasy eken, jınalǵan kópke kelip, Móńke bala bylaı depti: «Iá, aǵalar-bıler, sizder bul keńesti tym uzaqqa sozdyńyzdar ǵoı jáne bir sheshimge kele almadyńyzdar. Osynyń bıligin maǵan berseńizder, men tez bitirer edim», – depti. Kópshilik balanyń yqylasyna rıza bolyp, biraýyzdan: «Bılikti berdik, al aıta ǵoı», – desipti. Sonda Móńke bala bylaı depti: «Bul shaldyń ólimine kináli el emes, tentek. Al munda tentek – tórteý. Menińshe, sol tórt tentek qundy bólip tóleıtin bolsyn jáne erdiń quny júz jylqy bolsyn», – depti. Sonda Móńke bala: «Birinshi, myń jylqydan bir jýas at taba almaǵandaı, asaý baıtalǵa mingen jáne elde adam quryǵandaı asyq oınaǵan balalardan jón suraǵan baı tentek; ekinshi, adam kórmeı júrgendeı, baladan úrkip týlap, baıdy jyǵyp óltirgen baıtal tentek; úshinshi, ushyp túsken bórik tentek; tórtinshi baıtaldy úrkitken bala tentek. Minekı, osy tórteý qundy bólip tóleıtin bolsyn», – depti. Osy bılikke eki jaǵy da razy bolyp, balalardyń aýyly qunnyń tórt bóliginiń biri – jıyrma bes jylqy tólep qutylypty. Móńke balanyń bı bolýyna osy bılik basty sebep bolypty.
