سوڭعى جىلدارى قازاقستاندا ءبىلىم بەرۋ جۇيەسىن جاڭعىرتۋعا باعىتتالعان اۋقىمدى جوبالار ىسكە اسىرىلىپ كەلەدى. سولاردىڭ ىشىندە ەل پرەزيدەنتىنىڭ باستاماسىمەن جۇزەگە اسىپ جاتقان «كەلەشەك مەكتەپتەرى» ۇلتتىق جوباسى – ەرەكشە نازاردا. بۇل باستامانىڭ ماقساتى، قازىرگى احۋالى جانە بولاشاعى تۋرالى قر وقۋ-اعارتۋ مينيسترلىگى ورتا ءبىلىم كوميتەتىنىڭ توراعاسى قانىبەك جۇماشەۆ مىرزا ارنايى سۇحبات بەردى.
– قانىبەك بەكبولاتۇلى، ەڭ الدىمەن، ۇلتتىق جوباسىنىڭ ءمانى مەن ماڭىزىن قىسقاشا ءتۇسىندىرىپ وتسەڭىز.
– «كەلەشەك مەكتەپتەرى» – بۇل تەك جاڭا عيمارات سالۋ ەمەس. بۇل – بالانىڭ جان-جاقتى دامۋىنا قولايلى، قاۋىپسىز جانە ينكليۋزيۆتى ءبىلىم بەرۋ ورتاسىن قالىپتاستىرۋعا باعىتتالعان ۇلتتىق دەڭگەيدەگى ستراتەگيالىق جوبا.
مەملەكەت باسشىسى بۇل جوبانى ەلدەگى ورتا ءبىلىم ساپاسىن ارتتىرۋ، اۋىل مەن قالا اراسىنداعى ءبىلىم الشاقتىعىن جويۋ ءۇشىن ۇسىندى. ەڭ باستىسى – بۇل جوبا بارلىق بالاعا تەڭ مۇمكىندىك بەرۋدى كوزدەيدى.
– جوبا اياسىندا قانداي ناقتى ناتيجەلەرگە قول جەتكىزىلدى؟
– 2023 جىلدان باستاپ جوبانى كەزەڭ-كەزەڭىمەن جۇزەگە اسىرۋ باستالدى. قازىردىڭ وزىندە بىرقاتار وڭىردە جاڭا فورماتتاعى مەكتەپتەر اشىلدى. 2025 جىلدىڭ سوڭىنا دەيىن مۇنداي فورماتتاعى 217 مەكتەپتى قولدانىسقا بەرۋ جوسپارلانىپ وتىر. بۇل – 460 مىڭنان استام وقۋشى ورنى. سونىڭ ىشىندە 40 پايىزدان استامى اۋىلدىق ەلدى مەكەندەرگە تيەسىلى. بۇل – اۋىل بالاسى دا قالاداعىلارمەن بىردەي جاعدايدا ءبىلىم الۋىن قامتاماسىز ەتەدى دەگەن ءسوز.
– بۇل مەكتەپتەر بۇرىنعى مەكتەپتەردەن نەسىمەن ەرەكشەلەنەدى؟
– بىرىنشىدەن، جاڭا مەكتەپتەر كەڭ ءارى ەرگونوميكالىق تۇرعىدا ءتيىمدى ەتىپ جوبالانعان. تيپتىك مەكتەپتەرگە قاراعاندا 15–20%-عا ۇلكەن. ءار وقۋشىعا جەكە شكاف، ترانسفورمەر-پارتا، تىنىعۋ ايماعى قاراستىرىلعان.
ەكىنشىدەن، قاۋىپسىزدىك ءبىرىنشى ورىندا: Wi-Fi, بەينەباقىلاۋ، تۋرنيكەتتەر، جەدەل دابىل تۇيمەلەرى – بارلىعى ورتالىقتاندىرىلعان جۇيە ارقىلى باقىلانادى.
ۇشىنشىدەن، بۇل مەكتەپتەردە STEM-زەرتحانالار، IT كابينەتتەر، اسپازدىق جانە تىگىن شەبەرحانالارى، سپورت زالدارى، روبوتوتەحنيكا كابينەتتەرى جۇمىس ىستەيدى. بۇل – وقۋشىلارعا تەك تەوريا ەمەس، پراكتيكا ارقىلى ۇيرەنۋگە مۇمكىندىك بەرەدى.
– ينكليۋزيۆتى ءبىلىم بەرۋ تۋرالى دا ايتىپ وتسەڭىز…
– ءار مەكتەپتە ەرەكشە ءبىلىمدى قاجەت ەتەتىن بالالار ءۇشىن تولىق جاعداي جاسالعان. ليفت، پاندۋس، ارنايى دارەتحانالار، ينكليۋزيۆتى كابينەتتەر، لوگوپەد، پسيحولوگ قىزمەتى – بارلىعى قولجەتىمدى. ءبىلىم – بارلىق بالاعا بىردەي بولۋى كەرەك. بۇل – جوبانىڭ نەگىزگى ۇستانىمدارىنىڭ ءبىرى.
– ال مۇعالىمدەر شە؟ ولار وسىنداي جاڭا ورتادا جۇمىس ىستەۋگە دايىن با؟
– ءيا، بۇل وتە ماڭىزدى سۇراق. ءبىز تەك عيمارات سالىپ قويمايمىز، سول مەكتەپتەرگە ارنايى دايىندىقتان وتكەن مۇعالىمدەردى جىبەرۋدى كوزدەپ وتىرمىز. قازىردىڭ وزىندە 3 مىڭنان استام پەداگوگ ارنايى كۋرستاردان ءوتتى. ولاردىڭ ءبارى تسيفرلىق قۇرالدار، جاڭا ادىستەمەلەرمەن جۇمىس ىستەۋگە ماشىقتانىپ جاتىر.
سونىمەن قاتار جەتەكشى پەداگوگيكالىق جوعارى وقۋ ورىندارىمەن بىرلەسىپ، ارنايى كادر دايىنداۋ جۇيەسى جولعا قويىلدى. ال مەكتەپ ديرەكتورلارى «ءبىلىم بەرۋ سالاسىنداعى 1000 كوشباسشى» جوباسىنىڭ قاتىسۋشىلارى اراسىنان تاڭدالادى.
– وقۋشىلاردىڭ قىزىعۋشىلىعىن، قابىلەتىن دامىتۋ باعىتىندا قانداي تەتىكتەر بار؟
– جوبا شەڭبەرىندە باستاۋىش سىنىپتان باستاپ كاسىپتىك باعدار بەرۋ جۇيەسى ەنگىزىلەدى. 7-سىنىپتان باستاپ بەيىندى پاندەر، جەكە وقۋ باعىتتارى، مەنتورلىق جۇيە جولعا قويىلادى.
قازىر ءبىز «مانساپ كومپاسى» اتتى تسيفرلىق پلاتفورما ازىرلەنۋدە. بۇل – وقۋشىعا ءوزىنىڭ قىزىعۋشىلىعى مەن قابىلەتىنە قاراي بولاشاق ماماندىعىن تاڭداۋعا باعىت بەرەدى.
– بۇل مەكتەپتەر ەل دامۋىنا قالاي اسەر ەتەدى دەپ ويلايسىز؟
– ءبىلىم ساپاسىن، ينفراقۇرىلىمىن دامىتۋ – ادام كاپيتالىنا سالىنعان ينۆەستيتسيا. ءبىز ءبىلىمدى، باستاماشىل، جاۋاپكەرشىلىگى جوعارى ۇرپاق تاربيەلەۋ ارقىلى مەملەكەتتىڭ بولاشاعىن قالىپتاستىرىپ جاتىرمىز.
«كەلەشەك مەكتەپتەرى» – تەك ءبىلىم وشاعى ەمەس، ول زاماناۋي ويلايتىن، ۇلتتىق قۇندىلىقتى قادىرلەيتىن، تەحنولوگيالىق ساۋاتتى تۇلعانىڭ قالىپتاسۋ ورتاسى.
– ۋاقىت ءبولىپ، ناقتى اقپاراتپەن بولىسكەنىڭىز ءۇشىن العىس ايتامىز.
