قازاقستان العاش رەت ستراسبۋرگتە وتكەن سىبايلاس جەمقورلىققا قارسى مەملەكەتتەر توبىنىڭ (گرەكو) 100-پلەنارلىق وتىرىسىندا باعالاۋشى ەل رەتىندە قاتىستى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
«ەۋروپا كەڭەسىنىڭ عيماراتىندا سىبايلاس جەمقورلىققا قارسى مەملەكەتتەر توبىنىڭ (گرەكو) 100-پلەنارلىق وتىرىسى ءوتتى. وسى وتىرىس اياسىندا قازاقستان رەسپۋبليكاسى العاش رەت سىبايلاس جەمقورلىققا قارسى ۇسىنىستاردىڭ ورىندالۋىن باعالاۋعا باعىتتالعان بەسىنشى باعالاۋ كەزەڭىندە باعالاۋشى ەل رەتىندە قاتىستى»، – دەلىنگەن حابارلامادا.
گرەكو حاتشىلىعىنىڭ شەشىمىمەن قازاقستانعا چەح رەسپۋبليكاسىنداعى قۇقىق قورعاۋ ورگاندارىندا سىبايلاس جەمقورلىقتىڭ الدىن الۋعا قاتىستى ۇسىنىستاردىڭ ورىندالۋىن باعالاۋ تاپسىرىلعان.
باعالاۋ بويىنشا سەرىكتەس ەل رەتىندە فينليانديا تانىلدى، ول چەحيانىڭ ورتالىق مەملەكەتتىك ورگاندارىنداعى ۇسىنىستاردىڭ ورىندالۋىن تالداۋعا جاۋاپتى بولدى.
قازاقستان اتىنان وتىرىسقا سىبايلاس جەمقورلىققا قارسى ءىس-قيمىل اگەنتتىگىنىڭ اقمولا وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى ساعىنىش اياعانوۆا قاتىستى.
ول ۇلتتىق ساراپشى رەتىندە جۇرگىزىلگەن تالداۋ ناتيجەلەرىن تانىستىرىپ، ونىڭ نەگىزىندە ەسەپ ماقۇلدانعان.
حابارلامادا اتاپ وتىلگەندەي، الداعى التىنشى باعالاۋ كەزەڭىنە ەرەكشە نازار اۋدارىلدى. بۇل كەزەڭدە وڭىرلىك دەڭگەيدە سىبايلاس جەمقورلىقتىڭ الدىن الۋ ماسەلەلەرى ازاماتتىق قوعامنىڭ قاتىسۋىمەن قارالادى.
«وسى كەزەڭدەگى العاشقى باعالاۋلار ەستونيا، سلوۆاكيا، ليۋكسەمبۋرگ جانە سلوۆەنيادا وتەدى. سونىمەن قاتار قازاقستاننىڭ التىنشى كەزەڭگە باعالاۋشى ەل رەتىندە قاتىسۋ مۇمكىندىگى تالقىلاندى. بۇل ەلىمىزدىڭ حالىقارالىق ارەنادا ادالدىق پەن اشىقتىقتى نىعايتۋ باعىتىنداعى دايەكتى ساياساتىنىڭ زاڭدى جالعاسى بولماق»، – دەلىنگەن مالىمەتتە.
