ەۋروپالىق پارلامەنت، ەۋروپالىق كوميسسيا جانە ەۋرووداققا مۇشە مەملەكەتتەردىڭ وكىلدەرى كوشى-قون ساياساتىن قاتاڭداتاتىن جاڭا رەگلامەنت بويىنشا الدىن الا كەلىسىمگە كەلدى، دەپ حابارلايدى "ادىرنا" ۇلتتىق پورتالى DW-عا سىلتەپ.
قۇجات ەو اۋماعىندا باسپانا الۋ ءوتىنىشى قاناعاتتاندىرىلماعان جانە ەلدە زاڭدى تۇردە قالۋعا قۇقىعى جوق ميگرانتتاردى ءۇشىنشى ەلدەردەگى ارنايى ورتالىقتارعا جىبەرۋگە مۇمكىندىك بەرەدى. ەۋرووداق كەڭەسىنىڭ مالىمەتىنشە، جاڭا رەگلامەنت ميگرانتتاردى ەلدەن شىعارۋ راسىمدەرىن جەدەلدەتۋگە جانە ەو اۋماعىندا زاڭسىز جۇرگەن ازاماتتاردى قايتارۋ كورسەتكىشىن ارتتىرۋعا باعىتتالعان.
كيپر رەسپۋبليكاسىنىڭ كوشى-قون ماسەلەلەرى جونىندەگى ءمينيسترىنىڭ ورىنباسارى نيكولاس يواننيدەستىڭ ايتۋىنشا، جاڭا ەرەجەلەر ەۋرووداقتىڭ كوشى-قوندى باسقارۋ جۇيەسىنىڭ تيىمدىلىگىن ارتتىرۋعا مۇمكىندىك بەرەدى.
شەتەلدىك اقپارات اگەنتتىكتەرىنىڭ حابارلاۋىنشا، ميگرانتتارعا ارنالعان مۇنداي ورتالىقتاردى قۇرۋ يدەياسىن گەرمانيا، اۋستريا جانە دانيا سياقتى بىرقاتار مەملەكەتتەر قولداپ وتىر. بولاشاقتا ەۋرووداقپەن ارىپتەستىك ورناتۋى مۇمكىن ەلدەردىڭ قاتارىندا قازاقستان، وزبەكستان، رۋاندا جانە ۋگاندا اتالادى.
جاڭا رەگلامەنت زاڭدى نەگىزسىز ەو اۋماعىندا قالۋدان باس تارتقان ميگرانتتارعا قاتىستى جاۋاپكەرشىلىكتى دە كۇشەيتەدى. اتاپ ايتقاندا، ولاردى ۋاقىتشا قاماۋعا الۋ جيىلەپ، ەۋرووداق ەلدەرىنە قايتا كىرۋگە تىيىم سالۋ شارالارى كەڭىنەن قولدانىلۋى مۇمكىن. سونىمەن قاتار زاڭسىز كوشى-قونمەن كۇرەس اياسىندا الەۋمەتتىك تولەمدەردى قىسقارتۋ نەمەسە تولىق توقتاتۋ تەتىكتەرى دە قاراستىرىلعان.
اقپاراتقا سايكەس، جاڭا رەگلامەنت الداعى بىرنەشە اپتا ىشىندە ەۋروپالىق پارلامەنت پەن ەو ەلدەرى تاراپىنان تۇپكىلىكتى بەكىتىلۋى ءتيىس. ساراپشىلار بۇل ءراسىمنىڭ نەگىزىنەن فورمالدى سيپاتتا بولاتىنىن اتاپ وتۋدە، ويتكەنى باستاما بۇعان دەيىن ەۋروپارلامەنتتىڭ پروفيلدىك كوميتەتى مەن دەپۋتاتتار كورپۋسى تاراپىنان قولداۋ تاپقان. ال قۇقىق قورعاۋ ۇيىمدارى جاڭا ەرەجەلەردى سىنعا الىپ وتىر. ولاردىڭ پىكىرىنشە، ميگرانتتاردى وزدەرىمەن ەشقانداي بايلانىسى جوق ءۇشىنشى ەلدەرگە ورنالاستىرۋ ادام قۇقىقتارىنىڭ بۇزىلۋىنا اكەلۋى مۇمكىن.
