سىبايلاس جەمقورلىققا قارسى كۇرەس اگەنتتىگى مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىندە اسا ءىرى كولەمدە قارجى جىمقىرۋ فاكتىسىن انىقتادى، دەپ حابارلايدى “ادىرنا”.
انتيكور مالىمەتىنشە، بۇل ىسكە «الەۋمەتتىك مەديتسينالىق ساقتاندىرۋ قورى» ۇاق باسقارما توراعاسىنىڭ ورىنباسارى كۇدىكتى رەتىندە تانىلىپ وتىر. تەرگەۋ ماتەريالدارىنا سايكەس، 400 ملن تەڭگەدەن استام قارجىنىڭ ۇرلانۋىنا قاتىسى بار دەپ كۇدىككە ءىلىنىپ وتىر. بۇل قاراجات باستاپقىدا حالىققا مەديتسينالىق كومەك كورسەتۋ ءۇشىن بولىنگەن.
قارجى جىمقىرۋ «Damumed» اقپاراتتىق جۇيەسى ارقىلى جۇزەگە اسقان. شىعىس قازاقستان وبلىسى، ناقتىراق ايتقاندا، وسكەمەن قالاسىنىڭ تۇرعىندارىنا كورسەتىلدى دەپ جالعان مەديتسينالىق قىزمەتتەر ەنگىزىلگەن. انتيكور مالىمەتىنشە، وسىلايشا 30 مىڭنان استام جالعان جازبا تىركەلگەن.
بۇدان بولەك، شەنەۋنىك جەكە مەديتسينالىق مەكەمەنىڭ بيزنەسىنە زاڭسىز قاتىسىپ، ۇرلانعان قاراجاتقا قىمبات مۇلىك ساتىپ العان دەگەن كۇدىككە ءىلىندى.
سوت شەشىمىمەن كۇدىكتى قاماۋعا الىندى. قازىر ونىڭ باسقا ەپيزودتارعا قاتىسى بار-جوعى تەكسەرىلىپ جاتىر.
انتيكور سوڭعى ءۇش جىلدا دەنساۋلىق ساقتاۋ سالاسىندا 134 قىلمىستىق قۇقىقبۇزۋشىلىق تىركەلگەنىن حابارلايدى. ونىڭ ىشىندە 57 ادام سوتتالعان.
ۆەدومستۆو وكىلدەرى بۇل جاعدايلار حالىقتىڭ دەنساۋلىق ساقتاۋ جۇيەسىنە دەگەن سەنىمىن تومەندەتىپ، قىزمەتتىڭ ساپاسىنا كەرى اسەر ەتىپ جاتقانىن اتاپ ءوتتى.
ۇقساس جاڭالىقتار
