Sybailas jemqorlyqqa qarsy küres agenttıgı mındettı äleumettık medisinalyq saqtandyru (MÄMS) jüiesınde asa ırı kölemde qarjy jymqyru faktısın anyqtady, dep habarlaidy “Adyrna”.
Antikor mälımetınşe, būl ıske «Äleumettık medisinalyq saqtandyru qory» ŪAQ basqarma töraǧasynyŋ orynbasary küdıktı retınde tanylyp otyr. Tergeu materialdaryna säikes, 400 mln teŋgeden astam qarjynyŋ ūrlanuyna qatysy bar dep küdıkke ılınıp otyr. Būl qarajat bastapqyda halyqqa medisinalyq kömek körsetu üşın bölıngen.
Qarjy jymqyru «Damumed» aqparattyq jüiesı arqyly jüzege asqan. Şyǧys Qazaqstan oblysy, naqtyraq aitqanda, Öskemen qalasynyŋ tūrǧyndaryna körsetıldı dep jalǧan medisinalyq qyzmetter engızılgen. Antikor mälımetınşe, osylaişa 30 myŋnan astam jalǧan jazba tırkelgen.
Būdan bölek, şeneunık jeke medisinalyq mekemenıŋ biznesıne zaŋsyz qatysyp, ūrlanǧan qarajatqa qymbat mülık satyp alǧan degen küdıkke ılındı.
Sot şeşımımen küdıktı qamauǧa alyndy. Qazır onyŋ basqa epizodtarǧa qatysy bar-joǧy tekserılıp jatyr.
Antikor soŋǧy üş jylda densaulyq saqtau salasynda 134 qylmystyq qūqyqbūzuşylyq tırkelgenın habarlaidy. Onyŋ ışınde 57 adam sottalǧan.
Vedomstvo ökılderı būl jaǧdailar halyqtyŋ densaulyq saqtau jüiesıne degen senımın tömendetıp, qyzmettıŋ sapasyna kerı äser etıp jatqanyn atap öttı.
Ūqsas jaŋalyqtar
