الماتى وبلىسىنىڭ تالعار اۋداندىق پوليتسيا باسقارماسىنىڭ ەكى قىزمەتكەرى سىبايلاس جەمقورلىققا قاتىستى كۇدىكپەن ۇستالدى، دەپ حابارلايدى "ادىرنا" ءتىلشىسى.
ولار جەرگىلىكتى اكۆاپارك باسشىسىنان وزدەرى مەن تۋىستارىنا قىزمەتتەردى تەگىن كورسەتۋدى تالاپ ەتتى دەگەن كۇدىككە ىلىنگەن.
«ۆرەميا» مالىمەتىنشە، وقيعا شىلدە ايىنىڭ باسىندا تالعارداعى Aquasia Resort اكۆاپاركىندە باستالعان. دەمالىس ورنىندا ايەلدەردىڭ ءبىرى جاراقات العاننان كەيىن قاۋىپسىزدىك تالاپتارىن بۇزۋ دەرەگى بويىنشا قىلمىستىق ءىس قوزعالعان. الايدا تامىز ايىنىڭ سوڭىندا قىلمىس قۇرامى بولماۋىنا بايلانىستى ءىس توقتاتىلعان.
وسى ءىستى جۇرگىزگەن انىقتاۋشى مەن ونىڭ باسشىسى كەيىن اكۆاپارك ديرەكتورىنان وزدەرى جانە وتباسى مۇشەلەرى ءۇشىن بىرقاتار قىزمەتتى اقىسىز ۇسىنۋدى تالاپ ەتكەن. اتاپ ايتقاندا، ولار كىرۋ بيلەتتەرىن، مەيرامحانا قىزمەتىن جانە دەمالىس ۇيلەرىن تەگىن پايدالانۋدى سۇراعان.
باسىلىمنىڭ جازۋىنشا، ەكى پوليتسيا قىزمەتكەرى مەن ولاردىڭ جاقىن تۋىستارىنىڭ تەگىن دەمالۋىنان اكۆاپارككە شامامەن 500 مىڭ تەڭگە شىعىن كەلگەن. كەيىن ءتارتىپ ساقشىلارى بۇل قىزمەتتەردى اقىسىز پايدالانۋدى جالعاستىرماق بولعان.
وسىدان كەيىن اكۆاپارك ديرەكتورى الماتى وبلىسى ۇلتتىق قاۋىپسىزدىك كوميتەتى دەپارتامەنتىنىڭ سىبايلاس جەمقورلىققا قارسى قىزمەتىنە ارىزدانعان.
ارنايى قىزمەت وكىلدەرى ەكى پوليتسەيدى ۇستاعان. كەيىن ولاردىڭ قىزمەتتىك كابينەتتەرىندە ءتىنتۋ جۇرگىزىلگەن. وپەراتسياعا الماتى وبلىسى پوليتسيا دەپارتامەنتىنىڭ وزىندىك قاۋىپسىزدىك باسقارماسىنىڭ قىزمەتكەرلەرى دە قاتىسقان.
باسىلىم مالىمەتىنشە، ەكى قىزمەتكەر دە جەمقورلىق ارەكەتتەرىنە بايلانىستى قىزمەتتەن بوساتىلعان. قازىر انىقتاۋشى مەن ونىڭ باسشىسىنا قاتىستى قىلمىستىق ءىس تەرگەلىپ جاتىر.
