اكتوبە وبلىسىندا دەپو باستىعى 1,5 ميلليون تەڭگە پارا العانى ءۇشىن سوتتالدى، دەپ حابارلايدى "ادىرنا" ۇلتتىق پورتالى دياپازون سايتىنا سىلتەمە جاساپ.
ەمبى قالاسىنىڭ تۇرعىنى جۇمىسقا ورنالاسۋ ءۇشىن جەم ستانساسىنداعى ەكسپلۋاتاتسيالىق لوكوموتيۆ دەپوسىندا كومەكشى ماشينيست بولىپ جۇمىس ىستەگەن تانىسىنا جۇگىنگەن. ول ءوز كەزەگىندە دەپونىڭ كادرلار جونىندەگى مەنەدجەرىمەن بايلانىسىپ، جەتەكشىسىنە پارا بەرۋدى ۇسىنعان.
دەپو باستىعى كانديداتتىڭ جۇمىسقا قابىلدانۋىنا پارامەن كەلىسىپ، وعان سۇحباتقا ارنالعان سۇراقتار مەن جاۋاپتاردى بەرۋدى تاپسىرعان. كانديدات تەستىلەۋدەن قاجەتتى بالل جيناپ، سۇحباتتان ءساتتى وتكەن. الايدا ول قاجەتتى سومانى تابا الماي، جۇبايىنان 4 ميلليون تەڭگە نەسيە الۋدى سۇراعان. سونىڭ 1,5 ميلليون تەڭگەسىن ول دوسىنا بەرىپ، ول مەنەدجەر ارقىلى دەپو باستىعىنا جەتىزىلگەن. 300 مىڭ تەڭگە وسى سومادان كادرلار مەنەدجەرىنە دەلدالدىق قىزمەتى ءۇشىن بەرىلگەن.
سوتتا پارا بەرۋشى ايىپكەر، 1,5 ميلليون تەڭگەنى بەرگەننەن كەيىن ەكى كۇننەن سوڭ جۇمىسقا قابىلدانعانىن مويىندادى. ول تەك التى اي عانا جۇمىس ىستەپ، كەيىن جۇمىستان بوساتىلعان. پارا العان دەپو باستىعى داۋلەتقالي جالمۇحامبەتوۆ تە كىناسىن مويىندادى.
«العان اقشانى دەپو عيماراتىنىڭ جوندەۋىنە جۇمسادىم، سەبەبى بولىنگەن قاراجات جەتپەدى»، – دەدى سوتتا بۇرىنعى دەپو باستىعى جالمۇحامبەتوۆ.
سوت بارلىق ءتورت ايىپكەردى كىنالى دەپ تانىدى. دەپو باستىعى داۋلەتقالي جالمۇحامبەتوۆ ءۇش جارىم جىلعا باس بوستاندىعىنان ايىرىلدى. پارا بەرۋشى، ونىڭ دوسى جانە دەلدال رەتىندە ايىپتالعان ادام ءۇش جىلعا سوتتالسا، كادرلار مەنەدجەرى ءبىر جارىم جىلعا باس بوستاندىعىنان ايىرىلدى. بارلىق ءتورت ايىپكەرگە ءومىر بويى مەملەكەتتىك قىزمەتتە جۇمىس ىستەۋگە تىيىم سالىندى.
