ءماجىلىس «جاساندى ينتەللەكت تۋرالى» زاڭ جوباسىن ماقۇلدادى

ءماجىلىس دەپۋتاتتارى ءبىرىنشى وقىلىمدا «جاساندى ينتەللەكت تۋرالى» زاڭ جوباسىن جانە وعان ىلەسپە زاڭدارعا ەنگىزىلەتىن وزگەرىستەردى ماقۇلدادى، دەپ حابارلايدى "ادىرنا" ۇلتتىق پورتالى.  ءبىرىنشى قۇجات – «جاساندى ينتەللەكت تۋرالى» زاڭ. ول جەتى تاراۋ مەن 28 باپتان تۇرادى. زاڭنىڭ ماقساتى – جاساندى ينتەللەكتپەن (جي) جۇمىس ىستەۋگە ارنالعان بىرىڭعاي قۇقىقتىق نەگىز قالىپتاستىرۋ. نەگىزگى ەرەجەلەرگە مىنالار كىرەدى: جي-ءدى قولدانۋدى قۇقىقتىق جانە ۇيىمداستىرۋشىلىق تۇرعىدان رەتتەۋ; ايقىندىق پەن قاۋىپسىزدىكتى قامتاماسىز ەتۋ; مەملەكەتتىك ورگاندار مەن كۆازيمەملەكەتتىك سەكتوردا جي قولدانۋعا ارنالعان نورمالار; جي ورتاسىنىڭ بارلىق قاتىسۋشىلارىنىڭ قۇقىقتارى مەن مىندەتتەرىن ناقتىلاۋ; ۇكىمەتكە وسى سالاداعى مەملەكەتتىك ساياساتتى قالىپتاستىرۋ بويىنشا وكىلەتتىكتەردى كەڭەيتۋ. ەكىنشى قۇجات – ىلەسپە زاڭدارعا ەنگىزىلەتىن وزگەرىستەر، ولار مىناداي سالالارعا قاتىستى: جي ونىمدەرىن قولدانۋ كەزىندە تۇتىنۋشىلاردىڭ قۇقىقتارىن قورعاۋ; جەكە دەرەكتەردىڭ قورعالۋى; جي ۇلتتىق پلاتفورماسىنىڭ جۇمىس ىستەۋىنە قاجەتتى ەلەكتروندىق رەسۋرستارعا قول جەتكىزۋ; جي ارقىلى جاسالعان مەدياكونتەنت ارقىلى مانيپۋلياتسيا مەن فەيك اقپارات تاراتۋعا جول بەرمەۋ. اتالعان زاڭ جوباسىنا 12 تۇزەتۋ ەنگىزىلىپ، مينيسترلىكتەردىڭ، قوعام بەلسەندىلەرىنىڭ جانە ساراپشىلاردىڭ قاتىسۋىمەن تالقىلاۋدان ءوتتى. «بىرىنشىدەن، بۇل زاڭ جوباسى جاساندى ينتەللەكت تەحنولوگياسىن پايدالانۋ كەزىندە ازاماتتاردىڭ قاۋىپسىزدىگىن قامتاماسىز ەتۋگە باعىتتالعان. مۇندا قولدانۋشىلاردىڭ قۇقىقتارى مەن بوستاندىقتارى، سونداي-اق ولاردىڭ جەكە دەرەكتەرى ءسوز بولادى. سونىمەن قاتار، جاڭا تەحنولوگيانى قولدانۋ بارىسىندا بارلىق پروتسەستەردىڭ ايقىن ءارى قاۋىپسىز بولۋى اسا ماڭىزدى. ەكىنشىدەن، زاڭ جوباسى وسى سالاداعى ازىرلەۋشىلەر مەن ينۆەستورلار ءۇشىن تۇسىنىكتى ءارى اشىق “ويىن ەرەجەلەرىن” جاسايدى. بۇل قۇقىقتىق ايقىندىقتى قامتاماسىز ەتىپ، جي تەحنولوگيالارىنا دەگەن سەنىمدى ارتتىرادى جانە ينۆەستيتسيا تارتۋعا ىقپال ەتەدى» - دەدى دەپۋتات ەكاتەرينا سمىشلياەۆا زاڭ جوباسى ەكونوميكا سالالارىنا جي ەنگىزۋ ماسەلەسىندە مەملەكەتتىڭ ءرولىن ايقىندايدى. سونداي-اق ول جاساندى ينتەللەكت سالاسىنداعى قوعامدىق قاتىناستاردى رەتتەۋ قاعيداتتارىن بەلگىلەيدى. جوبا جي قولدانۋدىڭ نەگىزگى ەتيكالىق قاعيدالارىن بەكىتىپ، اۆتورلىق قۇقىقتى قورعاۋ تاسىلدەرىن انىقتايدى.