قازاقستاندا تەلەديدار كورۋ ايتارلىقتاي ارتتى. سوڭعى زەرتتەۋلەرگە قاراعاندا، ەل بويىنشا تەلەديدار اۋديتورياسى 21% وسكەن. بۇل ءوسىمنىڭ نەگىزگى بولىگى شاعىن قالالار مەن اۋىلداردىڭ ەنشىسىندە.
جەلتوقساننىڭ 24-ءى كۇنى الماتىدا ۇلتتىق مەديا قاۋىمداستىعىنىڭ جىلدى قورىتىندىلاعان جيىنى ءوتتى. سول جەردە 2025 جىلعا ارنالعان زەرتتەۋ ناتيجەلەرى مەن شاعىن قالالار مەن اۋىلدارداعى تەلەديدار كورەرمەنىن ولشەۋ بويىنشا جۇرگىزىلگەن سىناق جۇمىستارىنىڭ قورىتىندىسى جاريالاندى.
بيىل قازان ايىنان باستاپ ۇلتتىق مەديا قاۋىمداستىعى K Research Central Asia كومپانياسىمەن بىرگە تەلەديدار كورۋدى ولشەۋدىڭ اياسىن كەڭەيتتى. وسىلايشا، بۇرىن تەك حالقى كوپ قالالارمەن شەكتەلىپ كەلگەن زەرتتەۋگە العاش رەت اۋىلدار مەن شاعىن قالالار دا كىردى. بۇعان دەيىن تەلەديدار كورسەتكىشتەرى تەك 100 مىڭنان استام تۇرعىنى بار 21 قالادا عانا ەسەپتەلەتىن.
زەرتتەۋ تەلەديداردىڭ ءالى دە ەل ىشىندەگى ەڭ ىقپالدى اقپارات كوزدەرىنىڭ ءبىرى ەكەنىن كورسەتتى. اسىرەسە وڭىرلەردە تەلەديداردىڭ ورنى بولەك. شاعىن قالالار مەن اۋىل تۇرعىندارى كۇنىنە ورتا ەسەپپەن 198 مينۋت تەلەديدار كورەدى. بۇل ءىرى قالالارداعى كورسەتكىشتەن 21 مينۋتقا ارتىق. ال ۇلكەن قالالاردا حالىق تەلەديدارعا كۇنىنە ورتا ەسەپپەن 177 مينۋت بولەدى.
وتاندىق تەلەارنالاردىڭ كورەرمەنى دە وڭىرلەردە الدەقايدا كوپ. شاعىن قالالار مەن اۋىلدارداعى ورتاشا تاۋلىكتىك كورسەتكىش ءىرى قالالارمەن سالىستىرعاندا 40 پايىزعا جوعارى. سونىڭ ناتيجەسىندە ەل بويىنشا تەلەديدار كورەرمەنىنىڭ جالپى سانى ارتقان.
كۇن سايىن تەلەديدار قارايتىنداردىڭ ۇلەسى دە وڭىرلەردە باسىم. اۋىلدار مەن شاعىن قالالاردا حالىقتىڭ 44% تەلەديداردى كۇندە كورەدى. ال ءىرى قالالاردا بۇل كورسەتكىش 35% شاماسىندا. جالپى رەسپۋبليكا بويىنشا كۇندەلىكتى قامتۋ دەڭگەيى 40% جەتىپ وتىر.
زەرتتەۋ تاعى ءبىر ماڭىزدى جايتتى كورسەتتى: تەلەديداردىڭ جاس كورەرمەنى بۇگىندە وڭىرلەردە قالىپتاسىپ كەلەدى. شاعىن قالالار مەن اۋىلداردا 18–24 جاس ارالىعىنداعى جاستار تەلەديداردى بەلسەندىرەك كورەدى. بۇل توپتىڭ ۇلەسى 27%. ال ءىرى قالالاردا تەلەديداردى نەگىزىنەن 45 جاستان اسقان كورەرمەندەر كوبىرەك قارايدى.
سونىمەن بىرگە وڭىرلەردە تەلەديداردى قازاق تىلىندە كورەتىندەردىڭ ۇلەسى باسىم. اۋىلدار مەن شاعىن قالالاردا كورەرمەننىڭ 82% قازاق تىلىندەگى كونتەنتتى تاڭدايدى. ال ۇلكەن قالالاردا بۇل كورسەتكىش 59% قۇرايدى.
ۇلتتىق مەديا قاۋىمداستىعىنىڭ بايقاۋ كەڭەسىنىڭ توراعاسى كەمەلبەك ويشىباەۆتىڭ ايتۋىنشا، قازىر تەلەنارىقتاعى جاڭا ۇردىستەردى ايماقتار قالىپتاستىرىپ وتىر. جاس، تۇراقتى ءارى بەلسەندى كورەرمەن ءدال وسى وڭىرلەردە ءوسىپ كەلەدى. سوندىقتان تەلەارنالار اراسىنداعى باسەكە دە سول جاققا ويىسىپ جاتىر
زەرتتەۋ اۋماعىنىڭ كەڭەيۋى بۇكىل مەديا سالاسى ءۇشىن ماڭىزدى. بۇل تەلەارنالاردىڭ جۇمىسىن ەل كولەمىندە ءادىل باعالاۋعا، وڭىرلەردەگى كورەرمەننىڭ شىنايى ادەتىن ەسكەرۋگە جانە حالىق سۇرانىسىنا ساي مازمۇن ۇسىنۋعا جول اشادى.
