بۇگىن قازاقستاندا انالار كۇنى اتاپ وتىلۋدە، دەپ حابارلايدى "ادىرنا" ۇلتتىق پورتالى.
ۇكىمەتتىڭ 2023 جىلى قابىلداعان قاۋلىسىنا سايكەس، بۇل مەرەكە قىركۇيەكتەن مامىر ايىنىڭ ەكىنشى جەكسەنبىسىنە اۋىستىرىلعان.
انالار كۇنىنە وراي پرەزيدەنت قاسىم-جومارت توقاەۆ ءوز اناسى – تۇرار شابارباەۆا تۋرالى ەستەلىكتەرىمەن ءبولىستى.
«ءتورت بالالى ءبىزدىڭ وتباسى قاراپايىم تۇردى. انام ۇزاق ۋاقىت بويى بەلگىلى سەبەپتەرمەن جۇمىس ىستەمەدى، ول كىسى ءۇي جۇمىسىن اتقاردى. جالعىز اسىراۋشىمىز اكەي. ايلىق جالاقىدان بولەك، ول كەي-كەيدە ماقالالارى مەن كىتاپتارىنا قالاماقى الاتىن»، – دەپ جازدى مەملەكەت باسشىسى Instagram پاراقشاسىندا.
توقاەۆتىڭ ايتۋىنشا، اناسى وتە قاراپايىم ءومىر ءسۇرىپ، ءومىرىنىڭ سوڭىنا دەيىن ءوزىن كوپتەگەن دۇنيەدەن شەكتەپ وتكەن.
«شەشەي ول كەزدە جاس ايەل بولا تۇرا، كوپ نارسەدەن، ونىڭ ىشىندە اشەكەي زاتتار مەن قىمبات كيىمدەردەن تارتىناتىن. ارينە، ءساندى كيىنىپ، اسەم اشەكەيلەر تاققىسى كەلگەنى تابيعي عوي، الايدا بار ءومىرىن پەرزەنتتەرىنە ارناپ، انالىق پارىزىن قىسقا عۇمىرىنىڭ اقىرىنا دەيىن اتقارىپ ءوتتى. ءتىپتى، قىمبات دۇنيەلەر الاتىنداي مۇمكىندىك تۋعان كەزدە دە، وزىنە ۇناعان زاتتاردى نەمەرەلەرىنە اپەرۋمەن شەكتەلەتىن»، – دەدى قازاقستان پرەزيدەنتى.
توقاەۆ اناسىنىڭ كەيبىر شەنەۋنىكتەردىڭ ءبىر ساتتە بايىپ كەتكەنىن بىلسە دە، ونداي جولدىڭ ءتۇبى بولمايتىنىن ەسكەرتىپ وتىراتىنىن اتاپ ءوتتى.
پرەزيدەنت اناسىنىڭ ءاردايىم قولداۋ كورسەتكەنىن دە جەتكىزدى.
«انام ۇنەمى مەنى قولدايتىن. بالا كۇنىمنەن مەن ونىڭ كوپتەگەن ماعىناسى تەرەڭ مازمۇندى اڭگىمەلەرىن، وي-پىكىرى مەن پايىمداۋلارىن تىڭداپ ءوستىم عوي. اڭگىمەنى جاقسى ايتاتىن جانە مەنىڭ دە ىقىلاستانا تىڭدايتىنىمدى سەزگەن بولار، ءسويتىپ ومىرلىك دۇنيەتانۋىما ولشەۋسىز ىقپال ەتتى. جان-جاعىما بايىپتى قاراپ، ۇستامدى بولۋعا، جاقسىنى ۇيرەنۋگە جانە ودان تەك پايدالىسىن الۋعا ۇيرەتتى. «كۇنى بويى جانە كەشكە نەمەن اينالىساتىنىڭدى تاڭەرتەڭنەن ويلاۋ كەرەك. جيناقى ءجۇرۋ قاجەت، اسىپ-ساسقان ادام ساتسىزدىككە ۇشىرايدى» دەپ ءجيى ايتاتىن»، – دەدى توقاەۆ.
سونداي-اق، پرەزيدەنت اناسىنىڭ ءبارىن ەگجەي-تەگجەيلى ءبىلۋدى قاجەت دەپ ساناعانىن ايتتى.
«ءبىزدىڭ انامىز ۇساق-تۇيەك نارسەگە دەيىن تۇگەل ءبىلۋدى قاجەت سانادى. ول كىسىنىڭ قاتىسۋىنسىز اتا-انالار جينالىسى وتكەن ەمەس. ءتورت بالاسىنىڭ وقىتۋشىلارىنىڭ ءبارىن بىلەتىن. بالالىق تەنتەكتىگىمىزگە، جەتكىنشەكتىك قۋانىش پەن كۇيىنىش-سۇيىنىشىمىزگە قاتىستى جايلاردى ءتۇپ-تۇگەل سەزىنىپ وتىراتىن. انىعىن ايتقاندا، انامىزدان جاسىراتىن قۇپيامىز بولعان جوق. ول كىسى ءبىزدىڭ ومىرمەن عۇمىر كەشتى، ال ءبىز ونىڭ ءومىرىنىڭ اجىراماس بولشەگى ەدىك. انالاردىڭ قادىرىن ءبىلىپ، ءاردايىم قۇرمەت كورسەتىپ، ارداقتاپ جۇرىڭىزدەر!»، – دەپ قورىتىندىلادى قاسىم-جومارت توقاەۆ.
