مەملەكەت باسشىسى قاسىم-جومارت توقاەۆ بۇگىن، 23 تامىزدا تاۋەلسىزدىك سارايىندا وتكەن بريفينگتە پروتسەستەردى تسيفرلاندىرۋ اياسىنداعى جاڭا مىندەتتەر تۋرالى ايتتى. بۇل تۋرالى اقوردا جازدى، دەپ حابارلايدى “ادىرنا”.
پرەزيدەنت 2026 جىل تسيفرلاندىرۋ جانە جاساندى ينتەللەكت جىلى بولىپ جاريالانعانىن ەسكە سالدى.
"مەن بۇل تۋرالى جولداۋىمدا دا ايتامىن. ءبىز تسيفرلىق مەملەكەت قۇرۋدىڭ ءبىرىنشى كەزەڭىنەن – تسيفرلىق قىزمەتتەر كورسەتەتىن مەملەكەت قالىپتاستىرۋ كەزەڭىنەن وتتىك. باسقا ەلدەرمەن سالىستىرعاندا ءومىرىمىزدىڭ ايتارلىقتاي جەڭىلدەگەنىن وزدەرىڭىز دە كورىپ وتىرسىزدار. ۇيدەن شىقپاي-اق، بۇرىن كوپ ۋاقىتتى قاجەت ەتەتىن، ءتۇرلى مەكەمەلەرگە بارۋدى تالاپ ەتەتىن جانە تاعى باسقا كوپتەگەن ماسەلەلەردى شەشە الاسىزدار. سوندىقتان تسيفرلىق سەرۆيس مەملەكەتى – قاجەتتى كەزەڭ. قازىر ءبىز ەكىنشى كەزەڭگە ءوتىپ جاتىرمىز. مەن ۇكىمەتكە تسيفرلاندىرۋدىڭ حالىقارالىق كەلىسسوزدەر جۇرگىزۋ جانە تانىستىرىلىمدار وتكىزۋمەن عانا شەكتەلەتىن كەزەڭىندە ۇزاق كىدىرمەي، ءارى قاراي جىلجۋدى تاپسىردىم", – دەدى توقاەۆ.
ونىڭ ايتۋىنشا، قازىرگى تاڭدا تسيفرلاندىرۋ مەن جاساندى ينتەللەكتىنى ەلىمىزدىڭ بارلىق ازاماتتارىنىڭ يگىلىگىنە پايدالانۋ قاجەت.
"قاراپايىم تىلمەن ايتقاندا، سمارتفون – جاي عانا ويىنشىق ەمەس. سمارتفون – TikTok-تى شەكسىز كورۋگە ارنالعان قۇرال عانا ەمەس. سمارتفون – اقشا تابۋدىڭ قۇرالى. ماسەلەگە وسىلاي قاراۋىمىز كەرەك. اسىرەسە بۇل اۋىل شارۋاشىلىعى وندىرۋشىلەرىنە قاتىستى. ولار زاماناۋي تەحنولوگيالاردى ءوز وڭىرلەرىنەن شىقپاي-اق، اۋىلدىق جەردە تۇرىپ، بيزنەستەرىن جۇرگىزۋ ءۇشىن پايدالانۋى كەرەك جانە پايدالانا الادى. كەلەسى كەزەڭدە ۇكىمەتىمىز وسى مىندەتتى جۇزەگە اسىرادى", – دەپ تولىقتىردى مەملەكەت باسشىسى.
