Bügın Qazaqstanda Analar künı atap ötılude, dep habarlaidy "Adyrna" ūlttyq portaly.
Ükımettıŋ 2023 jyly qabyldaǧan qaulysyna säikes, būl mereke qyrküiekten mamyr aiynyŋ ekınşı jeksenbısıne auystyrylǧan.
Analar künıne orai Prezident Qasym-Jomart Toqaev öz anasy – Tūrar Şabarbaeva turaly estelıkterımen bölıstı.
«Tört balaly bızdıŋ otbasy qarapaiym tūrdy. Anam ūzaq uaqyt boiy belgılı sebeptermen jūmys ıstemedı, ol kısı üi jūmysyn atqardy. Jalǧyz asyrauşymyz äkei. Ailyq jalaqydan bölek, ol kei-keide maqalalary men kıtaptaryna qalamaqy alatyn», – dep jazdy Memleket basşysy Instagram paraqşasynda.
Toqaevtyŋ aituynşa, anasy öte qarapaiym ömır sürıp, ömırınıŋ soŋyna deiın özın köptegen dünieden şektep ötken.
«Şeşei ol kezde jas äiel bola tūra, köp närseden, onyŋ ışınde äşekei zattar men qymbat kiımderden tartynatyn. Ärine, sändı kiınıp, äsem äşekeiler taqqysy kelgenı tabiǧi ǧoi, alaida bar ömırın perzentterıne arnap, analyq paryzyn qysqa ǧūmyrynyŋ aqyryna deiın atqaryp öttı. Tıptı, qymbat dünieler alatyndai mümkındık tuǧan kezde de, özıne ūnaǧan zattardy nemerelerıne äperumen şekteletın», – dedı Qazaqstan Prezidentı.
Toqaev anasynyŋ keibır şeneunıkterdıŋ bır sätte baiyp ketkenın bılse de, ondai joldyŋ tübı bolmaitynyn eskertıp otyratynyn atap öttı.
Prezident anasynyŋ ärdaiym qoldau körsetkenın de jetkızdı.
«Anam ünemı menı qoldaityn. Bala künımnen men onyŋ köptegen maǧynasy tereŋ mazmūndy äŋgımelerın, oi-pıkırı men paiymdaularyn tyŋdap östım ǧoi. Äŋgımenı jaqsy aitatyn jäne menıŋ de yqylastana tyŋdaitynymdy sezgen bolar, söitıp ömırlık dünietanuyma ölşeusız yqpal ettı. Jan-jaǧyma baiypty qarap, ūstamdy boluǧa, jaqsyny üirenuge jäne odan tek paidalysyn aluǧa üirettı. «Künı boiy jäne keşke nemen ainalysatynyŋdy taŋerteŋnen oilau kerek. Jinaqy jüru qajet, asyp-sasqan adam sätsızdıkke ūşyraidy» dep jiı aitatyn», – dedı Toqaev.
Sondai-aq, Prezident anasynyŋ bärın egjei-tegjeilı bıludı qajet dep sanaǧanyn aitty.
«Bızdıŋ anamyz ūsaq-tüiek närsege deiın tügel bıludı qajet sanady. Ol kısınıŋ qatysuynsyz ata-analar jinalysy ötken emes. Tört balasynyŋ oqytuşylarynyŋ bärın bıletın. Balalyq tentektıgımızge, jetkınşektık quanyş pen küiınış-süiınışımızge qatysty jailardy tüp-tügel sezınıp otyratyn. Anyǧyn aitqanda, anamyzdan jasyratyn qūpiiamyz bolǧan joq. Ol kısı bızdıŋ ömırmen ǧūmyr keştı, al bız onyŋ ömırınıŋ ajyramas bölşegı edık. Analardyŋ qadırın bılıp, ärdaiym qūrmet körsetıp, ardaqtap jürıŋızder!», – dep qorytyndylady Qasym-Jomart Toqaev.
