Almaty qalasyndaǧy Nauryzbai audandyq sotynda bloger Alişer Temenovtıŋ üstınen qozǧalǧan sot prosesı jalǧasuda. Ol qazaqtyŋ ūly aqyny Mūqaǧali Maqataevtıŋ şyǧarmaşylyǧyn synap, ony «beişara erkek» dep ataǧany üşın jauapqa tartyluda, dep habarlaidy “Adyrna” ūlttyq portaly Orda.kz-ke sıltep.
Sot otyrysyna Temenov qoǧamdyq qorǧauşysy Meiırman Şekeevpen bırge keldı. Aita keteiık, bloger äzırge advokat jaldamaǧan. Ol sot zalynda beinejazba jürgızuge qarsylyq bıldırdı.
Qylmystyq ıs QR QK-nıŋ 131-babynyŋ 2-bölıgı – “Qorlau” boiynşa qaraluda. Sudia Beinegül Qaisynynyŋ töraǧalyǧymen ötıp jatqan tyŋdalymda poeziia alyptarynyŋ bırı Mūqaǧali Maqataevtıŋ ūly Jūldyz Maqataev blogerden moraldyq şyǧyn retınde 10 million teŋge öndırıp aludy jäne äleumettık jelılerde köpşılık aldynda keşırım sūraudy talap ettı.
«Bızdıŋ familiiamyzdy qaralap, moraldyq ziian keltırdı. Men şok jaǧdaiynda boldym. Mūndai auyr sözder üşın keşırım sūrauy – azamattyq paryzy», – dedı Jūldyz Maqataev.
Şekeevtıŋ aituynşa, Temenov öz äreketıne ökınıp, keşırım sūraǧan.
«Ekeuı de bır atanyŋ balalary. Bälkım, keşırım Sızge emes, jalpy jūrtqa arnaldy. Bıraq nietı bar», – dedı ol.
Dauly video ötken jyldyŋ qazan aiynda jariialanǧan. Onda Temenov Maqataevtyŋ şyǧarmaşylyǧyn synǧa alyp, jeke basyna tıl tigızgen. Video köp ūzamai öşırılgenımen, äleumettık jelılerde keŋ taralyp, halyqtyŋ aşu-yzasyn tuǧyzdy. Aqynnyŋ tuǧan jerı – Qarasaz auylynda tūrǧyndar blogerdıŋ üiıne baryp, tüsındıru jūmystaryn jürgızgen. Osydan keiın Temenov äkesımen bırge auylǧa kelıp, jūrtşylyqtan keşırım sūrady.
Sot otyrysy barysynda taraptarǧa 10 minuttyq üzılıs berılıp, tatulasu mümkındıgı qarastyryldy. Alaida Jūldyz Maqataev talaptar oryndalmaiynşa bıtımge kelmeitının aitty.
Blogerdıŋ özı – Almaty oblysy, Ūiǧyr audany, Sūnqar auylynyŋ tūrǧyny. Ol sotta äielı ekınşı balasyna jüktı ekenın, qyzy bar ekenın jäne tūraqty jūmys ıstemeitının, tek blog jürgızumen ainalysatynyn jetkızdı. Būǧan deiın sottalmaǧan.
Kelesı sot otyrysy kelesı aptada ötedı.
Ūqsas jaŋalyqtar
