1 مامىردا ۇلىتاۋ وبلىسىندا قازاقستان حالقىنىڭ بىرلىگى كۇنىنە جانە قازاقستان حالقى اسسامبلەياسىنىڭ 30 جىلدىعىنا ارنالعان رەسپۋبليكالىق «بىرلىك جۇگىرىسى–2025» مارافونى ءوتتى.
«30 جىل بىرلىك – 30 جىل اسسامبلەيا» ۇرانىمەن ۇيىمداستىرىلعان اۋقىمدى شاراعا 200-دەن استام ادام قاتىستى، دەپ حابارلايدى ۇلىتاۋ وبلىسىنىڭ اكىمدىگى.
جۇگىرۋ الاشاحان داڭعىلىنىڭ بويىمەن ءوتتى. شاراعا ءارتۇرلى جاستاعى جانە ۇلت وكىلدەرى، سونىڭ ىشىندە كاسىبي سپورتشىلار مەن سالاۋاتتى ءومىر سالتىن ۇستاناتىن تۇرعىندار قاتىستى.
بۇگىن ۇلىتاۋلىقتارمەن بىرگە ەلىمىزدىڭ 20 وڭىرىندە دە مارافون قاتار ءوتتى. بۇل اۋقىمدى سپورتتىق باستامانىڭ باستى ماقساتى – ۇلتتار دوستاستىعىن، ەل بىرلىگىن جانە سالاۋاتتى ءومىر سالتىن دارىپتەۋ.
— سپورت – بىرىكتىرۋشى كۇش. بۇگىن مەن ءتۇرلى ۇلت پەن جاستاعى ادامدارمەن بىرگە جۇگىردىم. بۇل – ەلىمىزدەگى شىنايى دوستىق پەن تاتۋلىقتىڭ بەلگىسى، – دەپ ءبولىستى مارافونعا قاتىسۋشىنىڭ ءبىرى.
جۇگىرۋ بىرنەشە قاشىقتىق بويىنشا ۇيىمداستىرىلدى. ەڭ كىشكەنتاي قاتىسۋشىلار مەن ەرەكشە قاجەتتىلىكتەرى بار ازاماتتار ءۇشىن 1 شاقىرىمدىق بالالار جانە ينكليۋزيۆتى جارىس ءوتتى. ال تاجىريبەلى سپورتشىلار 10 كم ارالىعىنداعى تراسسادا ءوز كۇشىن سىنادى.
شارا سوڭىندا مارافونعا قاتىسقاندار اراسىندا جۇلدەلەر ۇتىسى ۇيىمداستىرىلدى.
جۇگىرۋ مارافونى – بىرلىك كۇنىنە ارنالعان كەڭ كولەمدەگى ءىس-شارالاردىڭ ءبىر بولىگى عانا. ۇلىتاۋ وبلىسىنىڭ بارلىق وڭىرىندە بۇل كۇنى كونتسەرتتەر، سپورتتىق جارىستار، كورمەلەر جانە مادەني باعدارلامالار وتۋدە.
