1 mamyrda Ūlytau oblysynda Qazaqstan halqynyŋ bırlıgı künıne jäne Qazaqstan halqy Assambleiasynyŋ 30 jyldyǧyna arnalǧan respublikalyq «Bırlık jügırısı–2025» marafony öttı.
«30 jyl bırlık – 30 jyl Assambleia» ūranymen ūiymdastyrylǧan auqymdy şaraǧa 200-den astam adam qatysty, dep habarlaidy Ūlytau oblysynyŋ äkımdıgı.
Jügıru Alaşahan daŋǧylynyŋ boiymen öttı. Şaraǧa ärtürlı jastaǧy jäne ūlt ökılderı, sonyŋ ışınde käsıbi sportşylar men salauatty ömır saltyn ūstanatyn tūrǧyndar qatysty.
Bügın ūlytaulyqtarmen bırge elımızdıŋ 20 öŋırınde de marafon qatar öttı. Būl auqymdy sporttyq bastamanyŋ basty maqsaty – ūlttar dostastyǧyn, el bırlıgın jäne salauatty ömır saltyn därıpteu.
— Sport – bırıktıruşı küş. Bügın men türlı ūlt pen jastaǧy adamdarmen bırge jügırdım. Būl – elımızdegı şynaiy dostyq pen tatulyqtyŋ belgısı, – dep bölıstı marafonǧa qatysuşynyŋ bırı.
Jügıru bırneşe qaşyqtyq boiynşa ūiymdastyryldy. Eŋ kışkentai qatysuşylar men erekşe qajettılıkterı bar azamattar üşın 1 şaqyrymdyq balalar jäne inkliuzivtı jarys öttı. Al täjıribelı sportşylar 10 km aralyǧyndaǧy trassada öz küşın synady.
Şara soŋynda marafonǧa qatysqandar arasynda jüldeler ūtysy ūiymdastyryldy.
Jügıru marafony – Bırlık künıne arnalǧan keŋ kölemdegı ıs-şaralardyŋ bır bölıgı ǧana. Ūlytau oblysynyŋ barlyq öŋırınde būl künı konsertter, sporttyq jarystar, körmeler jäne mädeni baǧdarlamalar ötude.
