قازاقستاندا بەنزيننىڭ جەتكىلىكتى قورى بار. بۇل تۋرالى بۇگىن، 28 ساۋىردە ەنەرگەتيكا ءمينيسترى ەرلان اقكەنجەنوۆ ايتتى، دەپ حابارلايدى «ادىرنا» ءتىلشىسى.
ول اقپان ايىنان باستاپ بەنزين مەن ديزەلدى وتىننىڭ باعاسى مەملەكەت تاراپىنان رەتتەلمەيتىنىن مالىمدەدى. ايتۋىنشا، قازىرگى تاڭدا باعا سۇرانىس مەن ۇسىنىسقا قاراي انىقتالادى.
«ەلىمىزدەگى بەنزين جەتكىلىكتى مولشەردە. شاتاسپاسام، بەنزين قورى 42 كۇنگە جەتۋى كەرەك. سوندىقتان ونىڭ باعاسىن كوتەرەتىندەي ەشقانداي نەگىز جوق. ال ديزەلدى وتىننىڭ قورى شامامەن 28 كۇنگە جەتەدى. ديزەل بولماي قالادى دەيتىندەي الاڭداۋشىلىق جوق. ءبىز اۋىل شارۋاشىلىعى ءونىم وندىرۋشىلەرىنىڭ وتىنىمدەرىن ورىنداپ جاتىرمىز. سوندىقتان ەگىس ناۋقانىنا الاڭداپ وتىرعان جوقپىز. جالپى جانارماي نارىعى ارتىعىمەن تەڭگەرىمدى جاعدايدا تۇر»،—دەدى ول.
بۇعان دەيىن مينيسترلىك جانار-جاعارماي باعاسىنىڭ كۇرت كوتەرىلىپ كەتپەۋى ءۇشىن بارلىق مۇددەلى مەملەكەتتىك ورگانمەن تۇراقتى ءوزارا ءىس-شارالاردى جۇزەگە اسىراتىنىن جەتكىزگەن ەدى.
