بۇگىن قازاقستاندا رەسەيمەن بىرلەسىپ جاسالعان «سۇڭقار» ورتاشا زىمىرانىنىڭ تۇساۋكەسەرى جوسپارلانىپ وتىر. ۇشىرىلىم ساعات 16:00-دە «بايتەرەك» ۇشىرۋ كەشەنىنەن (بۇرىنعى №45 الاڭ) جۇزەگە اسىرىلادى، دەپ حابارلايدى "ادىرنا".
"بايقوڭىردا" ءبىر كۇندە ەكى زىمىران ۇشا ما؟
«سۇڭقار» زىمىرانىن باستاپقىدا 27 ناۋرىزدا ۇشىرۋ جوسپارلانعان بولاتىن. الايدا تەحنيكالىق سەبەپتەرگە بايلانىستى بۇل كۇندەر رەزەرۆكە اۋىستىرىلىپ، بىرنەشە ايعا شەگەرىلدى. 31 ناۋرىزدا زىمىران پايدالى جۇكتەمەنىڭ ماكەتىمەن بىرگە №42 الاڭداعى قۇراستىرۋ-سىناق كورپۋسىنان تەمىرجول ارقىلى №45 الاڭعا جەتكىزىلىپ، تىك كۇيدە ورناتىلدى.
عارىش ايلاعىنداعى دەرەككوزدىڭ حابارلاۋىنشا، 13–16 ساۋىرگە جوسپارلانعان رەزەرۆتىك كۇندەر 26 ساۋىرگە دەيىن شەگەرىلدى. بۇل ستارتتىق كەشەن جابدىقتارى مەن زىمىران-تاسىعىش جۇيەلەرىن قوسىمشا تەكسەرۋ قاجەتتىلىگىمەن بايلانىستى بولدى. قاجەتتى تەكسەرۋلەردەن كەيىن مەملەكەتارالىق كوميسسيا ۇشىرىلىم كۇنىن رەسمي تۇردە بەكىتكەن ەدى.
بۇگىن «بايقوڭىرداعى» تاعى ءبىر وقيعا - عارىش ايلاعىنان «پروگرەسس مس-34» جۇك كەمەسى حالىقارالىق عارىش ستانتسياسىنا (حعس) ءساتتى ۇشىرىلدى. وربيتاعا ونى «سويۋز 2.1ا» زىمىران تاسىمالداۋشىسى شىعاردى.
«روسكوسموس» حابارلاماسىنا سايكەس، بارلىق تەحنيكالىق جۇمىستار جوسپار بويىنشا ءوتتى: كەمە بەرىلگەن وربيتاعا شىعارىلىپ، زىمىراننىڭ ءۇشىنشى ساتىلىعىنان ءبولىندى، انتەننالار مەن كۇن باتارەيالارى اشىلدى. حعس-پەن ستانتسياعا جاقىنداۋى 28 ساۋىردە ساعات 03:01-دە ماسكەۋ ۋاقىتى بويىنشا كۇتىلۋدە.
95-ءشى قامتاماسىز ەتۋ ميسسياسى اياسىندا «پروگرەسس» كەمەسى ستانتسياعا شامامەن 2,5 توننا جۇك جەتكىزدى، ونىڭ ىشىندە 700 كگ جانارماي، 420 كگ ىشۋگە ارنالعان سۋ جانە 50 كگ وتتەگى بار. سونداي-اق، ەكيپاجعا ارنالعان 1 348 كگ قۇرعاق جۇك جەتكىزىلىپ، جاڭا «ورلان-مكس» № 8 سكافاندرى بەرىلدى.
20 جىلدان اسقان "بايتەرەكتىڭ" بابى
«بايتەرەك» عارىشتىق زىمىران كەشەنى — قازاقستان مەن رەسەيدىڭ بىرلەسكەن جوباسى. ول «بايقوڭىر» كەشەنىندە ەكولوگيالىق تازا وتىن كومپونەنتتەرىن پايدالاناتىن زىمىراندارمەن عارىشقا ۇشىرۋ جۇمىستارىن جۇرگىزۋگە ارنالعان جەرۇستى ينفراقۇرىلىمدى قۇرۋدى كوزدەيدى. جوبا 2004 جىلى قۇرىلعان، ال 2005 جىلى سول كەزدەگى قازاقستان پرەزيدەنتى نۇرسۇلتان نازارباەۆ پەن رەسەي پرەزيدەنتى ۆلاديمير ءپۋتيننىڭ بايقوڭىرعا ساپارى كەزىندە رەسمي تۇردە ىسكە قوسىلعان.
باستاپقىدا «انگارا» زىمىران-تاسىعىشىن پايدالانۋ جوسپارلانعان، ال وعان ارنالعان ۇشىرۋ كەشەنىن №200 الاڭداعى بۇرىنعى «پروتون» زىمىرانىنىڭ №40 ۇشىرۋ قوندىرعىسىنىڭ ورنىندا سالۋ كوزدەلگەن ەدى.
كەيىن رەسەي جوسپارىن وزگەرتىپ، قۇرىلىس ءۇشىن №250 الاڭداعى بۇرىن «ەنەرگيا» زىمىرانىن سىناۋعا ارنالعان امبەباپ ستەند-ستارت ورنىن ۇسىندى. الايدا بۇل جوبا دا جۇزەگە اسپادى.
كەيىنىرەك «زەنيت» زىمىراندارىن ۇشىرۋ باعدارلاماسى اياقتالعان سوڭ، №42 الاڭداعى قۇراستىرۋ-سىناق كورپۋسى مەن №45 الاڭداعى ۇشىرۋ كەشەنىن قامتيتىن بارلىق جەرۇستى ينفراقۇرىلىم «بايقوڭىر» كەشەنىن رەسەي فەدەراتسياسىنىڭ جالعا الۋ كەلىسىمىنەن شىعارىلىپ، قازاقستان تاراپىنا — «بايتەرەك» بىرلەسكەن كاسىپورنىنا بەرىلدى.
«انگارا» زىمىرانىنىڭ ورنىنا، وعان ارنالعان ۇشىرۋ كەشەنىنىڭ قۇرىلىسى باستالماعاندىقتان، جاڭا «سۇڭقار» زىمىران-تاسىعىشى بەكىتىلدى. بۇل زىمىران ءۇشىن «زەنيت» كەشەنىنەن قالعان ينفراقۇرىلىمدى بەلگىلى ءبىر جاڭعىرتۋلار ارقىلى پايدالانۋعا مۇمكىندىك بولدى.
«سۇڭقار» زىمىران-تاسىعىشى — ورتا كلاستى ەكى ساتىلى زىمىران. ول رەسەيدەگى «ركتس پروگرەسس» اكتسيونەرلىك قوعامىندا وندىرىلەدى.
تەحنيكالىق سيپاتتامالارى: زىمىراننىڭ بيىكتىگى — باس قاپتاماسىنا بايلانىستى 58,8 م نەمەسە 65,2 م; ديامەترى — 4,1 م; ۇشىرۋ ماسساسى — 526–531 توننا; تومەنگى جەر وربيتاسىنا شىعاراتىن پايدالى جۇك ماسساسى — 17,4 توننا; گەوستاتسيونارلىق وربيتاعا — 2,5 توننا.
قولدانىلاتىن وتىن مەن توتىقتىرعىش — ەكولوگيالىق قاۋىپسىز نافتيل (كەروسين ءتۇرى) جانە سۇيىق وتتەگى.
بۇعان دەيىن رەسەيلىك باق-تىڭ زىمىران اتاۋىنا قاتىستى پىكىر جاريالاعان ەدىك. ال بىلتىر بايقوڭىرداعى گاگارين ستارت الاڭىنىڭ ورنىنان كونە وركەنيەت وشاعى تابىلعانى حابارلانعان بولاتىن.
