فوتو: e-history.kz
1990 جىلدىڭ 24 ساۋىرىندە نۇرسۇلتان نازارباەۆ قازاق كەڭەستىك سوتسياليستىك رەسپۋبليكاسىنىڭ پرەزيدەنتى بولىپ سايلاندى. بۇل شەشىم قازاق سسر جوعارعى كەڭەسىنىڭ سەسسياسىندا قابىلداندى، دەپ حابارلايدى "ادىرنا".
پرەزيدەنتتىك ينستيتۋتتى ەنگىزۋ باستاماسى 1990 جىلعى 15 ناۋرىزدا كسرو-دا پرەزيدەنتتىك قىزمەتتىڭ پايدا بولۋىمەن تۇسپا-تۇس كەلدى. سول كۇنى ميحايل گورباچەۆ كەڭەس وداعىنىڭ پرەزيدەنتى بولىپ سايلانعان ەدى. وسىدان كەيىن قازاقستاندا دا پرەزيدەنتتىك باسقارۋ جۇيەسىن ەنگىزۋ ماسەلەسى كوتەرىلدى.
1990 جىلعى 12 ساۋىردە «قازاق سسر پرەزيدەنتى قىزمەتىن تاعايىنداۋ جانە كونستيتۋتسياعا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى جاريالانىپ، تالقىلاۋعا ۇسىنىلدى. ەكى اپتادان سوڭ، 24 ساۋىردە جوعارعى كەڭەس زاڭدى قابىلداپ، پرەزيدەنت سايلاۋىن وتكىزدى. جاسىرىن داۋىس بەرۋگە قاتىسقان 335 دەپۋتاتتىڭ 317-ءسى نازارباەۆتى قولداپ، 18-ءى قارسى داۋىس بەرگەن.
ناتيجەسىندە 49 جاستاعى نۇرسۇلتان نازارباەۆ ءوزى باسقاراتىن جوعارعى سوۆەتتە ءوزى پرەزيدەنت بولىپ سايلاندى. ونىڭ كانديداتۋراسىن قازاقستان كومپارتياسى ورتالىق كوميتەتىنىڭ 21-پلەنۋمى ۇسىنعان بولاتىن.
كەيىن، 1990 جىلعى 20 قاراشادا قابىلدانعان زاڭعا سايكەس، قازاق كسر پرەزيدەنتى جوعارى اتقارۋشى جانە وكىمشى بيلىكتىڭ باسشىسى بولىپ بەكىتىلدى.
