وزبەكستان ولي ءماجىلىسىنىڭ زاڭ شىعارۋ پالاتاسىنىڭ دەپۋتاتى وديلجون توجيەۆ رەسەي سىرتقى ىستەر ءمينيسترى سەرگەي لاۆروۆتىڭ سامارقاندتاعى ماڭگىلىك الاۋ جانىندا ورىس تىلىندەگى جازۋدىڭ بولماۋىنا قاتىستى مالىمدەمەسىنە جاۋاپ بەردى، دەپ حابارلايدى “ادىرنا” ۇلتتىق پورتالى.
بۇعان دەيىن رەسەي سىرتقى ىستەر ءمينيسترى سەرگەي لاۆروۆتىڭ سامارقاندقا جاساعان ساپارى تۋرالى حابارلاعان ەدىك. ساپار بارىسىندا لاۆروۆ سامارقاندتاعى ماڭگىلىك الاۋ جانىندا ورىس تىلىندە جازۋدىڭ جوقتىعىنا نازار اۋدارعان.
رەسەيلىك ساياساتكەرگە وزبەكستان ولي ءماجىلىسىنىڭ زاڭ شىعارۋ پالاتاسىنىڭ دەپۋتاتى وديلجون توجيەۆ قىسقا، بىراق نىق پىكىر ءبىلدىردى.
"وزبەك حالقى ءتىلدى مىندەت ەمەس، مۇمكىندىك رەتىندە تاڭدايدى. شەت ءتىلىن جاساندى تۇردە ىلگەرىلەتۋ – سۇيىسپەنشىلىك ەمەس، جاۋلىق تۋدىرادى. ەگەر ماسكەۋدىڭ باس الاڭىندا وزبەك تىلىندە جازۋ بولسا، وندا بۇل تۋرالى ويلانۋعا بولادى", – دەپ جازدى دەپۋتات.
