كونستيتۋتسيالىق كوميسسيانىڭ ءۇشىنشى وتىرىسىندا ءماجىلىس دەپۋتاتى ەلنۇر بەيسەنباەۆ كوميسسيا جۇمىسى قوعامنىڭ زاماناۋي سۇرانىستارىنا جاۋاپ بەرەتىن اتا زاڭدى دايىنداۋعا باعىتتالعانىن اتاپ ءوتتى. ول «AMANAT» پارتياسى رەفورمالاردى جۇزەگە اسىرۋعا بەلسەندى قاتىسىپ وتىرعانىن جانە پرەزيدەنت باستامالارىن قولدايتىنىن ايتتى.
دەپۋتاتتىڭ ايتۋىنشا، كوميسسيا اشىقتىق قاعيداتتارى مەن بارلىق ساياسي پارتيالاردىڭ پىكىرىن ەسكەرۋ نەگىزىندە جۇمىس ىستەۋدە، ال كونستيتۋتسيالىق وزگەرىستەر ينستيتۋتسيونالدىق تۇرعىدان مىقتى پارلامەنت قالىپتاستىرۋعا باعىتتالعان.
«بۇگىنگى تاڭدا ءبىز قولدانىستاعى نەگىزگى زاڭعا تۇزەتۋلەر ەنگىزۋ بويىنشا عانا ەمەس، ادىلەتتى قازاقستاننىڭ سۇرانىستارىنا جاۋاپ بەرەتىن جاڭا كونستيتۋتسيانى ءىس جۇزىندە قالىپتاستىرىپ جاتىرمىز. بۇل، كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت قاعيداتىنا نەگىزدەلگەن، بيلىك ارحيتەكتۋراسىن جۇيەلى تۇردە قايتا قۇرۋ دەگەن ءسوز»، – دەدى ەلنۇر بەيسەنباەۆ.
ول ءبىر پالاتالى پارلامەنتكە كوشۋ زاڭ شىعارۋ ءىسىن جەدەلدەتىپ، ساياسي پارتيالاردىڭ ءرولىن كۇشەيتەتىنىنە ءارى دەپۋتاتتاردىڭ قوعام الدىنداعى جاۋاپكەرشىلىگىن ارتتىراتىنىنا نازار اۋداردى.
«بارلىق زاڭدار ءبىر پارلامەنتتە ءۇش وقىلىمنان وتەدى: العاشقى ەكەۋى – اشىق تۇردە، ءۇشىنشىسى – كونستيتۋتسيا مەن ۇلتتىق زاڭناماعا سايكەستىگىن تەكسەرۋ ءۇشىن. بۇل لوببيستىك ىقپال مەن جەكە مۇددەلەردىڭ ارالاسۋىن تولىقتاي جوققا شىعارادى»، – دەپ اتاپ ءوتتى دەپۋتات.
بەيسەنباەۆ سونداي-اق پروپورتسيونالدى سايلاۋ جۇيەسىنىڭ جانە پارتياىشىلىك پرايمەريزدىڭ ماڭىزىن ايتتى. ونىڭ سوزىنشە، بۇل تەتىكتەر سايلاۋشىلار مەن پارلامەنت قۇرامى اراسىنداعى تىكەلەي بايلانىستى قامتاماسىز ەتەدى، ونىڭ ىشىندە جەكە ازاماتتاردىڭ وكىلدەرى دە بولادى.
«پروپورتسيونالدى جۇيە سايلاۋشى مەن پارلامەنت اراسىنداعى تىكەلەي بايلانىستى بىلدىرەدى. پارتيا ءاربىر داۋىس ءۇشىن كۇرەسەدى، ونىڭ ىشىندە تاۋەلسىز ازاماتتىڭ داۋىسى دا بار، بۇل قوعام الدىنداعى جاۋاپكەرشىلىكتى كۇشەيتەدى»، – دەدى دەپۋتات.
سونىمەن قاتار، وتىرىس بارىسىندا نەكەنى ەر مەن ايەلدىڭ وداعى رەتىندە بەكىتۋ تۋرالى، كونستيتۋتسيانىڭ پرەامبۋلاسىن «ادىلەتتى قازاقستان» جانە «زاڭ مەن ءتارتىپ» قاعيداتتارىنا باسىمدىق بەرە وتىرىپ جاڭارتۋ، سونداي-اق زياتكەرلىك مەنشىكتى قورعاۋدى كۇشەيتۋ جونىندەگى تۇزەتۋلەر ۇسىنىلدى.
«بولاشاق پارلامەنتتى قۇرىلتاي دەپ اتاۋ – تاريحي ءارى قازىرگى زامان ءۇشىن ماڭىزدى. بۇل داستۇرمەن، ۇلتتىق رۋحپەن جانە حالىق الدىنداعى جاۋاپكەرشىلىكپەن ساباقتاستىقتى بىلدىرەدى»، – دەپ ءسوزىن تۇيىندەدى ەلنۇر بەيسەنباەۆ.
