Birqatar sheteldik BAQ-ta Astana Reseımen shekarada aýmaqtyq qorǵanys brıgadalarynyń iri tobyn ornalastyratyny, Qazaqstan Reseımen janjal týyndaǵan jaǵdaıda daıyndyq sharalaryn qabyldap jatqany týraly aqparat tarady. Alaıda, ol jalǵan aqparat bolyp shyqty. Bul týraly Stopfake.kz saıty jarııalady, dep habarlaıdy “Adyrna” ulttyq portaly.
Qazaqstan Respýblıkasy Qorǵanys mınıstrliginiń baspasóz qyzmeti bul aqparatqa qatysty túsinikteme berdi.
«Birqatar sheteldik BAQ-ta «Aýmaqtyq qorǵanys týraly» Qazaqstan Respýblıkasy Zańynyń jobasyna qatysty jarııalanymdarǵa baılanysty Qazaqstan Respýblıkasy Qorǵanys mınıstrligi faktilerdiń burmalanýy men jón-josyqsyz túsindirýlerdi boldyrmaý úshin resmı túsinikteme berýdi qajet dep sanaıdy.
Bul zań jobasy tek eldiń ishki qaýipsizdigin nyǵaıtýǵa baǵyttalǵan jáne Reseıge qarsy baǵytty qamtymaıdy.
«Aýmaqtyq qorǵanys týraly» zań jobasy Qazaqstannyń Ulttyq qaýipsizdik júıesin jańǵyrtý sheńberinde ázirlendi. Onyń maqsaty – ishki turaqtylyqty qamtamasyz etý, halyqty, ınfraqurylym nysandaryn jáne áskerı nemese ózge de tótenshe jaǵdaılar kezinde aýmaqtyq tutastyqty qorǵaý. Aýmaqtyq qorǵanys brıgadalaryn ornalastyrý syrtqy qaýipterge jaýap retinde emes, óńirlerdiń logıstıkalyq, geografııalyq jáne demografııalyq erekshelikterin eskere otyryp júzege asyrylady», – delingen QR Qorǵanys mınıstrliginiń baspasóz qyzmetiniń habarlamasynda.
Sonymen qatar, vedomstvonyń habarlaýynsha, shetel azamattary men azamattyǵy joq adamdardyń aýmaqtyq qorǵanys bólimshelerine qatysýy kózdelmegen. Zańnyń qabyldanýy kez kelgen elge qarsy emes jáne belgili bir baǵyttaǵy qaýiptiń kórinisi retinde qabyldanbaýy kerek.
«Reseı – UQShU, TMD, ShYU jáne Eýrazııalyq ekonomıkalyq odaq sheńberinde tatý kórshilik jáne odaqtastyq qatynastardy qoldaıtyn Qazaqstannyń strategııalyq seriktesi.
Osylaısha, Qazaqstan Respýblıkasynyń «Aýmaqtyq qorǵanys týraly» zań jobasynyń Reseıge qarsy baǵyttylyǵy týraly málimdeme shyndyqqa janaspaıdy, ári bolyp jatqan proesterdiń mánin burmalaıdy.
Azamattar men BAQ-tan BAQ-ta jáne áleýmettik jelilerde paıda bolatyn túrli qaýesetterge nazar aýdarmaı, tek resmı aqparat kózderine senýin suraımyz», – dep habarlady QR Qorǵanys mınıstrligi.
