قازاقستان جەرىندە سيرەك كەزدەسەتىن مەتالدار ءالى وندىرىلمەگەن. بىراق پەرسپەكتيۆالى ايماقتار اشىلعان. بۇل تۋرالى Informburo.kz سايتىنىڭ ساۋالىنا يندۋستريا جانە قۇرىلىس مينيسترلىگى جاۋاپ بەردى، دەپ حابارلايدى “ادىرنا” ۇلتتىق پورتالى.
مينيسترلىك مالىمەتىنشە، جەردە سيرەك كەزدەسەتىن مەتالدارعا يتتري، لانتان جانە لانتانويدتار توبىنا جاتاتىن 13 ەلەمەنت (تسەري، پرازەوديم، نەوديم، ساماري، ەۆروپي، گادوليني، تەربي، ديسپروزي، گولمي، ەربي، تۋلي، يتتەربي، ليۋتەتسي) كىرەدى. قازاقستاندا ولار باسقا قاتتى پايدالى قازبالارمەن بىرگە كەزدەسەدى جانە جاناما تۇردە الىنۋى مۇمكىن.
ماماندار ەلىمىزدىڭ شىعىس جانە ورتالىق ايماقتارىندا جەر قويناۋىن زەرتتەپ، بەريلي، يتتري، نيوبي، ۆولفرام، گالي، تسەزي جانە باسقا سيرەك مەتالداردىڭ قورلارى بار 20 ورىندى انىقتادى.
«كۇيرەكتىكول» ۋچاسكەسىنىڭ شيكىزات قورىنىڭ جەتكىلىكتىلىگى بويىنشا وڭ باعا الىندى، بۇل ۋچاسكەلەر بارلاۋ ليتسەنزياسى بويىنشا ودان ءارى زەرتتەۋ ءۇشىن جەر قويناۋىن پايدالانۋعا بەرىلەدى»، - دەدى مينيسترلىك.
مەملەكەتتىك بيۋدجەت ەسەبىنەن ورتالىق قالبا اۋماعىن زەرتتەۋ جانە باعالاۋ جۇمىستارى جالعاسۋدا. جۇمىستار 2026 جىلى اياقتالۋى جوسپارلانعان.
ايتا كەتسەك، اقش پرەزيدەنتى دونالد ترامپ ۋكرايناداعى مينەرالدى رەسۋرستارعا، سونىڭ ىشىندە جەردە سيرەك كەزدەسەتىن قازبالارعا قول جەتكىزۋ تۋرالى كەلىسسوزدەر جۇرگىزگەن. سونىمەن قاتار، ول رەسەيدىڭ سيرەك مەتالدارىنا قول جەتكىزۋ ءۇشىن كەلىسىمدەر جاساۋعا قىزىعۋشىلىق تانىتقانىن مالىمدەگەن، سەبەبى ولار جوعارى تەحنولوگيالىق جابدىقتار وندىرىسىنە قاجەت.
