قىرعىزستانداعى “روسسوترۋدنيچەستۆو” وكىلى وشتاعى ورىس ءۇيىنىڭ قىزمەتكەرى ناتاليا سەكەرينانىڭ تۇتقىندالۋىنا الاڭداۋشىلىق ءبىلدىردى. ول ۋكراينا اۋماعىنداعى اسكەري قيمىلدارعا جالدامالىلاردى تارتتى دەگەن كۇدىككە ىلىنگەن. بۇل تۋرالى «ينتەرفاكس» اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
«سەكەرينا – قىرعىزستان ازاماتى، ءبىزدىڭ وشتاعى بولىمشەنىڭ جەرگىلىكتى قىزمەتكەرى. ول 2024 جىلدىڭ شىلدە ايىنان باستاپ ورىس ۇيىندە جۇمىس ىستەيدى، مەديا سالاسىمەن ءوزارا ءىس-قيمىلعا جاۋاپتى. ءبىز ونى ادال، اشىق ءارى جاۋاپتى قىزمەتكەر رەتىندە تانيمىز»، – دەدى روسسوترۋدنيچەستۆو وكىلدەرى.
ۇيىم وكىلدەرى ءىستىڭ ناقتى ءمان-جايى تۋرالى تولىق اقپاراتقا يە ەمەسىن ايتىپ، تەرگەۋ بارىسىندا بارلىعى انىقتالادى دەپ ءۇمىت ءبىلدىردى. سونىمەن قاتار، رەسەيدىڭ عىلىم جانە مادەنيەت ورتالىعىنىڭ تەك ۇكىمەتارالىق كەلىسىم اياسىندا جۇمىس ىستەيتىنى ەرەكشە اتاپ ءوتىلدى.
سەكەرينا مەن تاعى بىرنەشە ادام قىرعىزستان ازاماتتارىن باسقا ەلدەردەگى قارۋلى قاقتىعىستارعا قاتىسۋعا تارتتى دەگەن كۇدىكپەن ۇستالعانى 17 ساۋىردە حابارلانعان. 23 ءساۋىر كۇنى بىشكەكتەگى پەرۆوماي اۋداندىق سوتىنىڭ ءباسپاسوز حاتشىسى نۋرزينا مۋرزاەۆا بۇل اقپاراتتى راستادى. ونىڭ ايتۋىنشا، سەكەرينا بۇرىن جۋرناليست بولىپ جۇمىس ىستەگەن. ال ەكىنشى كۇدىكتى سەرگەي لاپۋشكين – وش قالاسى اكىمدىگىنىڭ ءباسپاسوز قىزمەتىندە بولعان. ولارمەن بىرگە تاعى ەكى ادامنىڭ ۇستالعانى بەلگىلى بولدى، الايدا ولاردىڭ جەكە تۇلعالارى انىقتالىپ جاتىر.
ۇستالعاندارعا قاتىستى «جالدامالىلىق» بابى بويىنشا قىلمىستىق ءىس قوزعالدى. بارلىعىنا قاتىستى بۇلتارتپاۋ شاراسى رەتىندە 2025 جىلدىڭ 17 ماۋسىمىنا دەيىن قاماۋعا الۋ شەشىمى شىعارىلعان. كۇدىكتىلەردىڭ بىرىمەن جۇمىس ىستەيتىن ادۆوكاتتىڭ ايتۋىنشا، ولار ۋكراينا اۋماعىنداعى اسكەري قيمىلدارعا ادامدار تارتتى دەگەن كۇدىككە ىلىنگەن. بۇل اقپارات راستالسا، ولارعا 15 جىلعا دەيىن باس بوستاندىعىنان ايىرىلۋ قاۋپى ءتونىپ تۇر.
