Qyrǵyzstandaǵy “Rossotrýdnıchestvo” ókili Oshtaǵy Orys úıiniń qyzmetkeri Natalıa Sekerınanyń tutqyndalýyna alańdaýshylyq bildirdi. Ol Ýkraına aýmaǵyndaǵy áskerı qımyldarǵa jaldamalylardy tartty degen kúdikke ilingen. Bul týraly «Interfaks» agenttigi jarııalady, dep habarlaıdy “Adyrna” ulttyq portaly.
«Sekerına – Qyrǵyzstan azamaty, bizdiń Oshtaǵy bólimsheniń jergilikti qyzmetkeri. Ol 2024 jyldyń shilde aıynan bastap Orys úıinde jumys isteıdi, medıa salasymen ózara is-qımylǵa jaýapty. Biz ony adal, ashyq ári jaýapty qyzmetker retinde tanımyz», – dedi Rossotrýdnıchestvo ókilderi.
Uıym ókilderi istiń naqty mán-jaıy týraly tolyq aqparatqa ıe emesin aıtyp, tergeý barysynda barlyǵy anyqtalady dep úmit bildirdi. Sonymen qatar, Reseıdiń ǵylym jáne mádenıet ortalyǵynyń tek úkimetaralyq kelisim aıasynda jumys isteıtini erekshe atap ótildi.
Sekerına men taǵy birneshe adam Qyrǵyzstan azamattaryn basqa elderdegi qarýly qaqtyǵystarǵa qatysýǵa tartty degen kúdikpen ustalǵany 17 sáýirde habarlanǵan. 23 sáýir kúni Bishkektegi Pervomaı aýdandyq sotynyń baspasóz hatshysy Nýrzına Mýrzaeva bul aqparatty rastady. Onyń aıtýynsha, Sekerına buryn jýrnalıst bolyp jumys istegen. Al ekinshi kúdikti Sergeı Lapýshkın – Osh qalasy ákimdiginiń baspasóz qyzmetinde bolǵan. Olarmen birge taǵy eki adamnyń ustalǵany belgili boldy, alaıda olardyń jeke tulǵalary anyqtalyp jatyr.
Ustalǵandarǵa qatysty «Jaldamalylyq» baby boıynsha qylmystyq is qozǵaldy. Barlyǵyna qatysty bultartpaý sharasy retinde 2025 jyldyń 17 maýsymyna deıin qamaýǵa alý sheshimi shyǵarylǵan. Kúdiktilerdiń birimen jumys isteıtin advokattyń aıtýynsha, olar Ýkraına aýmaǵyndaǵy áskerı qımyldarǵa adamdar tartty degen kúdikke ilingen. Bul aqparat rastalsa, olarǵa 15 jylǵa deıin bas bostandyǵynan aıyrylý qaýpi tónip tur.
