"قوينىنا سىر بۇككەن كەزدەسۋ". اقپاننىڭ 20-جۇلدىزىندا اقش پرەزيدەنتى دجو بايدەن "بەيسەۋىت جۇرىسكە سالىپ", توسىننان، جارياسىز-جاسىرىن كيەۆكە سوقتى. اقش بيلىگىنىڭ اق شاتىرىنا اينالعان اق ءۇيدىڭ ءباسپاسوز قىزمەتى مۇنداي مالىمدەمەنى ايتقان جوق. ولار قۇراما شتاتتار باسشىسىنىڭ رەسمي ساپارمەن پولشاعا بارىپ-قايتاتىنىن، ال ۋكرايناعا بەت بۇرمايتىنىن باسا حابارلاعان ەدى.
كيەۆكە ساپار اسا قۇپيا جوسپارمەن جاسىرىن تۇردە جۇزەگە استى. بايدەن سەنبىنىڭ قوڭىر كەشىندە قوعام نازارىنان بوي تاسالاپ، جىراققا كەتتى. جانىنا جۋرناليستەر مەن رەپورتەرلەردى ەرتپەدى. پرەزيدەنت جەكسەنبى كۇنى قۇلقىن سارىدە ۆاشينگتوندا بولۋى ءتيىس ەدى. بىراق ۋكراينا استاناسىنان بىراق شىقتى.
اقش باسشى كيەۆكە تابان تىرەگەن سەنبىنىڭ تاڭىندا قاۋىپ-قاتەر ىقتيمالى ۇلعايىپ، قالادا دابىل قاعىلىپ جاتتى. مۇنداي ساپاردى، ءتىپتى، اقش ۇلتتىق قاۋىپسىزدىك كەڭەسىنىڭ باسشىسى دجون كيربي جوققا شىعارىپ باققان ەدى. ول پرەزيدەنتتىڭ پولشاعا بارىپ، كەرى قايتاتىنىن مالىمدەگەن.
دەگەنمەن، ساپاردان ءبىر كۇن بۇرىن Politico باسىلىمى مۇندا ءبىر گاپ بارىن اڭداعان. ولار بايدەننىڭ ۋكراينا شەكاراسىنان جاسىرىن وتۋگە مۇمكىندىك ىزدەپ جاتقانىن جازىپ، استىرتىن قادامداردىن سەزگەن. بىراق ساياسي ەليتانىڭ كوپشىلىگى مۇنداي "جانكەشتى" ارەكەت بايدەننىڭ جەكە باسىنا قاۋىپ توندىرەتىنىن ايتىپ، مۇمكىن ەمەس دەپ سانادى.
بايدەننىڭ كيەۆكە ساپارى، CNN جازعانداي، "قۇپياعا تولى". اقش پرەزيدەنتى اقش تەڭىز اۆياتسياسىنىڭ ەندريۋس بازاسىنان (EST) تاڭعى ساعات 4:15-تە ۇشادى. رەپورتەرلەرگە ءوز قۇرىلعىلارىن الىپ جۇرۋگە تىيىم سالىنادى.
بايدەن كەلگەن تاڭدا كيەۆتىڭ ورتالىعىنداعى بىرنەشە كوشەدە كولىك قوزعالىسى توقتاتىلدى. بىراق جەرگىلىكتى بۇقارالىق اقپارات قۇرالدارى ەش قۇلاقتاندىرىلمايدى. امەريكا پرەزيدەنتىنىڭ ساپارى رەسمي تۇردە حابارلانبايدى. بايدەننىڭ كەلۋى تۋرالى العاش جازعان بلوگەر - مارك فەيگين. كەيىن سوقتالى ساياسي جاڭالىقتى "قازىرگى ۋكراينا" جۋرناليستەرى ءىلىپ اكەتىپ، بايدەن مەن ۆلاديمير زەلەنسكيدىڭ كيەۆ ورتالىعىنداعى ميحايلوۆسكي الاڭىندا جۇرگەن ۆيدەوسىن جاريالادى. ول زەلەنسكيمەن بىرگە ميحايلوۆسكي شىركەۋىنە بارىپ، "كوكتەگى جۇزدىكتەر" اتتى باتىرلار مەموريالىنا گۇل شوقتارىن قويدى.
كوپ ۇزاماي بايدەننىڭ ساپارىن زەلەنسكيدىڭ ءوزى راستادى، ول اقش پرەزيدەنتىمەن بىرگە تۇسكەن فوتوسۋرەتىن جاريالادى، سودان كەيىن عانا بارىپ اق ءۇي رەسمي مالىمدەمەنى ماقۇلدادى.
اق ءۇيدىڭ مالىمدەمەسىندە بايدەن "ۋكراينا دەموكراتياسىنا، ەگەمەندىگى جانە تەرريتوريالىق تۇتاستىعىنا مىزعىماس ءارى تالاسقا تۇسپەيتىن" قاعيداتتى ماقۇلداۋ ءۇشىن بارعان دەپ كورسەتىلەدى. ونىڭ ۋكرايناعا كورسەتىلەر كومەك ۇلەسىن كەڭەيتۋ ماسەلەسىن تالقىلايتىنى ايتىلادى.
"پۋتين ءوزىنىڭ شاپقىنشىلىق ارەكەتىن ءبىر جىل بۇرىن باستاعاندا ۋكراينانى وڭاي شاعىلاتىن جاڭعاق دەپ ويلادى. باتىسىڭ بولسا، قاق جارىلدى. پۋتين و باستا كۇشەنىپ، ءتىپتى بىزدەن اسىپ تۇسەمىن دەپ ويلادى. بىراق ول وڭباي قاتەلەستى", — دەپ جازدى بايدەن.
اقش پرەزيدەنتى ۋكرايناعا "اسا قاجەتتى قۇرىل-جابدىقتى"جەتكىزۋ بۇيرىعىن جاريالادى. CNN-ءنىڭ كورسەتۋىنشە، ۋكرايناعا قوسىمشا بەرىلەتىن كومەك مولشەرى 500 ميلليون دوللارعا پارا-پار. "قولداۋ قورجىنىندا" (پاكەت) اسكەري تەحنيكا، سونىڭ ىشىندە ارتيللەريالىق وق-دارىلەر، تانككە قارسى "دجاۆەلين" كەشەندەرى مەن گاۋبيتسالار توپتاستىرىلادى.
بايدەننىڭ كيەۆكە ساپارى كەزىندە اۋە دابىلى ۇزدىكسىز زارناپ، ساقتىق شارالارىنان حابارلاپ جاتتى. بىراق رەسەي زىمىرانداردىڭ كيەۆ اسپانىن بۇركەپ، اۋە كەڭىستىگىن الەمتاپىراق ەتكەنى جايلى دەرەكتەر تىركەلگەن جوق.
"ادىرنا" ۇلتتىق پورتالى
