ۋكراينا پرەزيدەنتى ۆلاديمير زەلەنسكي رەسەي پرەزيدەنتى ۆلاديمير پۋتينگە اشىق حات جولداپ، سوعىستى اياقتاۋ ماقساتىندا تىكەلەي كەزدەسۋ وتكىزۋدى ۇسىندى، دەپ حابارلايدى "ادىرنا".
حاتىندا زەلەنسكي سوعىس ءپۋتيننىڭ جەكە تاڭداۋى ەكەنىن، الايدا ونىڭ پىكىرىنشە، قازىر بۇل سوعىس رەسەيلىكتەردى دە قاناعاتتاندىرماي وتىرعانىن ايتتى.
«ۋكراينا سوعىستى ءسىز بەن ءبىزدىڭ ارامىزداعى كەلىسسوزدەر ارقىلى اياقتاۋدى ۇسىنادى. مەن سىزگە كەزدەسۋدى ۇسىنامىن»، – دەلىنگەن حاتتا.
ۆلاديمير زەلەنسكي ماسكەۋدەن باسقا كەز كەلگەن جەردە – شۆەيتساريادا، تۇركيادا نەمەسە اراب ەلدەرىنىڭ بىرىندە كەزدەسۋگە دايىن ەكەنىن مالىمدەدى.
سونداي-اق ول كەزدەسۋدىڭ ناقتى كۇنىن بەلگىلەۋدى ۇسىندى.
«ۋكراينا كەلىسسوزدەر ءجۇرىپ جاتقان كەزەڭدە تولىق اتىستى توقتاتۋعا دايىن. ۋكراينا اسكەري تۇتقىنداردى ء“بارىن بارىنە” قاعيداتى بويىنشا الماستىرۋعا دايىن، بۇل سوعىستى اياقتاۋدىڭ جاقسى باستاماسى بولار ەدى. سوعىس كەزىندە اكەتىلگەن بەيبىت تۇرعىندار مەن بالالاردى قايتارۋ ءۇشىن ماڭىزدى قادامدار جاساۋ قاجەت. ۋكرايندار مەن رەسەيلىكتەردىڭ كەلەر ۇرپاعىنىڭ بولاشاعى قانداي بولاتىنىن انىقتاۋ كەرەك.
ەگەر ءسىز جەكە ءوز ويىڭىزدا بۇل سوعىستى اياقتايتىن ۋاقىت كەلگەنىن تۇسىنبەسەڭىز، ۋكراينا ءوز ءومىر ءسۇرۋى ءۇشىن كۇرەستى جالعاستىرادى. ءبىزدى قولدايتىندار بولادى. بىراق سىزگە دە ءوز ءومىرىڭىز ءۇشىن الدەقايدا كوبىرەك كۇرەسۋگە تۋرا كەلەدى – رەسەي ءۇشىن ەمەس، ءوزىڭىزدىڭ جەكە ءومىرىڭىز ءۇشىن. بۇل مەنىڭ نەمەسە ۋكراينانىڭ تاراپىنان ايتىلعان قوقان-لوقى ەمەس. بۇل – رەسەي تاريحىنىڭ ءسىز جاقسى بىلەتىن شىندىقتارى: رەسەي شارشاعان كەزدە وزگەرىستەر بولادى. ءبىز سونداي شارشاۋدى كۇشەيتۋ باعىتىندا جۇمىس ىستەي الامىز. ال ءسىز ءوز سوعىسىڭىزدى توقتاتا الاسىز»، – دەلىنگەن ۆلاديمير زەلەنسكيدىڭ اشىق حاتىندا.
رەسەي پرەزيدەنتىنىڭ ءباسپاسوز حاتشىسى دميتري پەسكوۆ كرەملدە بۇل حاتتى كورگەندەرىن، الايدا ۆلاديمير ءپۋتيننىڭ ازىرگە ونىڭ مازمۇنىمەن تانىسپاعانىن ايتتى.
بۇعان دەيىن ۆلاديمير زەلەنسكي رەسەي پرەزيدەنتى ۆلاديمير پۋتينمەن كەزدەسۋگە دايىن ەكەنىن مالىمدەپ، سوعىستى اياقتاۋعا اقش كومەكتەسەدى دەپ ۇمىتتەنەتىنىن ايتقان بولاتىن.
