2025 جىلدىڭ قاڭتار-ناۋرىز ايلارى ارالىعىندا قازاقستان ورتالىق قىتايداعى حۋنان پروۆينتسياسىندا وندىرىلگەن رەلستىك كولىككە ارنالعان جابدىقتاردى يمپورتتاۋدا جەتەكشى ەلگە اينالدى، دەپ حابارلايدى "ادىرنا" ۇلتتىق پورتالى. بۇل تۋرالى حۋنان پروۆينتسياسىنىڭ حالىق ۇكىمەتىنىڭ رەسمي سايتىندا ايتىلدى.
چانشا كەدەنىنىڭ دەرەكتەرىنە سايكەس، 2025 جىلدىڭ ءبىرىنشى توقسانىنىڭ قورىتىندىسى بويىنشا حۋنان پروۆينتسياسىنان رەلستىك كولىككە ارنالعان جابدىقتاردىڭ ەكسپورتى 45,3 پايىزعا ارتىپ، جالپى سوماسى 340 ملن يۋانعا جەتكەن. بۇل جابدىقتاردى ەڭ كوپ يمپورتتاعان ەلدەر قاتارىندا قازاقستان، گەرمانيا جانە گونكونگ ارنايى اكىمشىلىك اۋدانى بار. ولاردىڭ ۇلەسى سايكەسىنشە 15,7%، 14% جانە 11,6% قۇرادى.
اتاپ ايتقاندا، قازاقستانعا رەلستىك كولىككە ارنالعان جابدىقتار ەكسپورتىنىڭ كولەمى 52,83 ملن يۋانعا جەتىپ، وتكەن جىلدىڭ وسى كەزەڭىمەن سالىستىرعاندا 505 ەسە وسكەن.
بۇل سالاداعى ءىرى جەتكىزۋشىلەردىڭ ءبىرى – حۋنان پروۆينتسياسىنداعى چجۋچجوۋ لوكوموتيۆ جاساۋ كومپانياسى.
ول قىتايدىڭ CRRC لوكوموتيۆ جاساۋ كورپوراتسياسىنىڭ قۇرامىنا كىرەدى جانە ەلەكتروۆوزدار، قالالىق رەلستىك كولىككە ارنالعان ۆاگوندار مەن جوعارى جىلدامدىقتاعى پويىزدار شىعارادى. قازىرگى تاڭدا كومپانيانىڭ ەل ىشىندە جانە شەتەلدە 34 ەنشىلەس كاسىپورنى بار.
