كوكجايلاۋ شاتقالىندا تاۋ-شاڭعى كۋرورتىن سالۋ كوزدەلۋدە. جوبانىڭ ەگجەي-تەگجەيىن «Kazakh Tourism» ۇلتتىق كومپانياسى ءتۇسىندىردى، دەپ حابارلايدى «ادىرنا» ءتىلشىسى.
تۋريستىك كەشەندى ىسكە قوسۋ 2028 جىلدىڭ سوڭى – 2029 جىلدىڭ باسىنا جوسپارلانعان.
Almaty Superski كۋرورتىنىڭ باس جوسپارىنا سايكەس (اۋماعى – 1 مىڭ گەكتار), شاتقالدا جالپى ۇزىندىعى 60 كم بولاتىن تاۋ-شاڭعى تراسسالارى سالىنادى. ولار كۇمبەل جانە ءۇش باۋىرشىڭدارىن قامتيدى. مارشرۋتتاردىڭ 70%-ى جاساندى قار جۇيەسىمەن جابدىقتالادى. كۋرورت اۋماعىندا 16 كوتەرگىش جۇمىس ىستەيدى.
تراسسالاردىڭ كۇردەلىلىك دەڭگەيى ءتورت ساناتقا بولىنبەك. كۋرورتتىڭ وتكىزۋ قابىلەتى كۇنىنە 10 مىڭ شاڭعىشىعا, ال جىلدىق تۋريستەر اعىنى 9 ملن ادامعا دەيىن جەتەدى دەپ كۇتىلۋدە.
سونىمەن قاتار اۋماعى 20 گەكتار بولاتىن 6,5 مىڭ ورىندىق شالە مەن قوناقۇيلەردەن تۇراتىن تۋريستىك اۋىل سالۋ جوسپارلانعان. جەكە تۇرعىن ۇيلەر مەن كوپقاباتتى تۇرعىن كەشەندەر قاراستىرىلمايدى.
جوبانىڭ جالپى قۇنى ءالى ەسەپتەلىپ جاتىر. الماتىدا قوعامدىق تىڭداۋلار وتكىزۋ جوسپارلانىپ وتىر، ول كەلەسى جىلدىڭ باسىندا ءوتۋى مۇمكىن.
ەسكە سالا كەتەيىك، بۇعان دەيىن پرەمەر-مينيستر ولجاس بەكتەنوۆ كوكجايلاۋداعى تاۋ-شاڭعى كۋرورتىنىڭ قۇرىلىسى بيىل باستالاتىنىن حابارلاعان ەدى.
كوكجايلاۋ اۋماعىندا تاۋ-شاڭعى كۋرورتىن سالۋ جوباسى تۋرالى العاش رەت 2000-جىلداردىڭ باسىندا كەڭىنەن ايتىلا باستاعان ەدى. ول كەزدە بۇل باستامانى BONITA كومپانيالار توبى جۇزەگە اسىرماق بولعانىمەن، ينۆەستور تابىلماعان. بيلىك 2011 جىلى جوباعا قايتا ورالىپ، تەحنيكالىق-ەكونوميكالىق نەگىزدەمە ازىرلەۋگە بيۋدجەتتەن العاش رەت قارجى بولگەن.
بۇعان جاۋاپ رەتىندە ەكولوگتار مەن بەلسەندىلەر پەتيتسيالار ۇيىمداستىرىپ،. دەرەكتى فيلمدەر تۇسىرگەن ەدى. ودان بولەك، حالىقارالىق ۇيىمدارعا جۇگىنىپ، سوتقا تالاپ-ارىزدار بەرگەن. بۇل كۇرەس 2019 جىلعا دەيىن جالعاستى. سول جىلى پرەزيدەنت قاسىم-جومارت توقاەۆ كوكجايلاۋدا كۋرورت سالۋعا تىيىم سالىپ، بۇل جوبانىڭ «قاجەت ەمەس» ەكەنىن مالىمدەگەن.
سۋرەت: adamdar.ca
