«استانا» حالىقارالىق قارجى ورتالىعىنىڭ (احقو) يۋريسديكتسياسىندا Bereke Wanrun Mining Ltd (BWM) اتتى جاڭا كومپانيا تىركەلدى. بۇل تۋرالى احقو دەرەكتەرىندە كورسەتىلگەن، دەپ حابارلايدى "ادىرنا".
مالىمەتكە سايكەس، كومپانيا مەتالل پايدالى قازبالارىن جوبالاۋ، بارلاۋ جانە ءوندىرۋ قىزمەتتەرىن كورسەتۋمەن اينالىسادى.
احقو مالىمەتىنشە، BWM كومپانياسىنىڭ جارعىلىق كاپيتالى 100 اقش دوللارىن قۇرايدى. ول ارقايسىسى 1 دوللاردان باعالانعان 100 اكتسيادان تۇرادى. كومپانيانىڭ ەكى يەسى بار — QazMetX Ltd. جانە WR Holdings Kazakhstan co. Ltd.
WR Holdings Kazakhstan co. Ltd. كومپانياسىنىڭ قۇرىلتايشىسى – Wanrun Resources Holding PTE. Ltd.. سينگاپۋردىڭ بيزنەس-انىقتامالىعى دەرەكتەرىنە سايكەس، بۇل كومپانيا شەتەلدە تىركەلگەن جانە سالىقتان بوساتىلعان. قۇرىلتايشىلارى تۋرالى اقپارات اشىق دەرەككوزدەردە كورسەتىلمەگەن.
QazMetX Ltd. كومپانياسى قۋات تانىسباەۆقا تيەسىلى. Kompra سەرۆيسىندەگى اقپاراتقا سايكەس، 2001–2002 جىلدارى اتى-ءجونى بىردەي ادام سول كەزدەگى قازاقستان رەسپۋبليكاسى پرەمەر-ءمينيسترىنىڭ ورىنباسارى كاريم ءماسىموۆتىڭ كومەكشىسى بولعان.
اشىق دەرەككوزدەرگە سۇيەنسەك، قۋات تانىسباەۆ 2018 جىلدان بەرى قازاقستان قوناق ۇيلەر مەن مەيرامحانالار قاۋىمداستىعىنىڭ ۆيتسە-پرەزيدەنتى قىزمەتىن اتقارىپ كەلەدى. بۇعان دەيىن ول «استانا-زەلەنستروي» باسقارما توراعاسىنىڭ ءبىرىنشى ورىنباسارى، قازاقستان جاس كاسىپكەرلەر قاۋىمداستىعىنىڭ باس ديرەكتورى، تۋريزم يندۋسترياسى كوميتەتىنىڭ توراعاسى بولعان.
