شىمكەنت اكىمىنىڭ ورىنباسارى رۋسلان بەردەنوۆكە جاسالعان قاستاندىق تۋرالى جاڭا مالىمەتتەر جاريالاندى، دەپ حابارلايدى "ادىرنا" ۇلتتىق پورتالى.
23 ءساۋىر كۇنى وتكەن بريفينگتە شىمكەنت قالاسى اكىمىنىڭ ورىنباسارى سارسەن قۇرانبەك ارىپتەسىنە جاسالعان شابۋىلعا قاتىستى ناقتى دەرەكتەردى ايتتى. ول شابۋىلدان كەيىن كۇدىكتىنى ۇستاۋعا بەردەنوۆتىڭ جۇرگىزۋشىسى كومەكتەسكەنىن راستادى.
«كۇدىكتىنى ۇستاۋعا جۇرگىزۋشى كومەكتەستى دەۋگە بولادى. بۇل ماسەلە تەرگەۋ بارىسىندا ناقتى انىقتالادى. الدىن الا مالىمەت بولجام بويىنشا، جۇرگىزۋشى كولىگىمەن كۇدىكتىنىڭ جانىنا بارىپ، ونى ۇستاۋعا اسەر ەتكەن بولۋى مۇمكىن. بىراق ناقتى ۇستاپ، قاماۋعا الۋ جۇمىستارىن پوليتسيا قىزمەتكەرلەرى جۇرگىزدى»، – دەدى سارسەن قۇرانبەك.
سونداي-اق، شىمكەنت قالاسى اكىمىنىڭ ورىنباسارى اكىمدىك باسشىلارىنا جەكە كۇزەت بولىنبەگەنىن ايتتى.
«زارداپ شەككەن اكىم ورىنباسارى بەردەنوۆتە دە، باسقا اكىمدىك باسشىلارىندا دا جەكە كۇزەت جوق. ءتىپتى قالا اكىمى عابيت ءابدىماجيتوۆتىڭ ءوزى دە كۇزەتسىز جۇرەدى. ءبىز قاراپايىم حالىقپەن ەركىن ارالاسامىز، اشىق جۇمىس ىستەيمىز. بۇل سىزدەرگە دە بەلگىلى جايت»، – دەدى قۇرانبەك.
سارسەن قۇرانبەك وقيعانىڭ سەبەپتەرى تۋرالى ءتۇرلى الىپ-قاشپا اڭگىمەلەرگە ەمەس، تەك رەسمي مالىمەتتەرگە سەنۋگە شاقىردى.
«شابۋىلدىڭ سەبەپتەرى تۋرالى ءتۇرلى قاۋەسەتتەر تاراۋدا. بۇل اقپاراتتار شىندىققا جاناسپايدى. تەرگەۋ قورىتىندىسى عانا شىندىقتى انىقتايدى. مۇمكىن، شابۋىل جاساۋشى پسيحيكالىق اۋىتقۋعا ۇشىراعان نە پسيحوتروپتىق زاتتاردىڭ اسەرىندە بولعان شىعار – ءبىز ناقتى ايتا المايمىز»، – دەدى ول.
ەسكە سالا كەتەيىك، 21 ءساۋىر كۇنى كەشكە شىمكەنت قالالىق اكىمدىگى عيماراتىنىڭ ماڭىندا رۋسلان بەردەنوۆكە وق اتىلعان ەدى. ول جاراقات الىپ، اۋرۋحاناعا جەتكىزىلدى، قازىرگى تاڭدا ەم قابىلداۋدا. ال كۇدىكتى ۇستالىپ، قىلمىستىق ءىس قوزعالدى.
