Shymkent ákiminiń orynbasary Rýslan Berdenovke jasalǵan qastandyq týraly jańa málimetter jarııalandy, dep habarlaıdy "Adyrna" ulttyq portaly.
23 sáýir kúni ótken brıfıngte Shymkent qalasy ákiminiń orynbasary Sársen Quranbek áriptesine jasalǵan shabýylǵa qatysty naqty derekterdi aıtty. Ol shabýyldan keıin kúdiktini ustaýǵa Berdenovtiń júrgizýshisi kómekteskenin rastady.
«Kúdiktini ustaýǵa júrgizýshi kómektesti deýge bolady. Bul másele tergeý barysynda naqty anyqtalady. Aldyn ala málimet boljam boıynsha, júrgizýshi kóligimen kúdiktiniń janyna baryp, ony ustaýǵa áser etken bolýy múmkin. Biraq naqty ustap, qamaýǵa alý jumystaryn polıııa qyzmetkerleri júrgizdi», – dedi Sársen Quranbek.
Sondaı-aq, Shymkent qalasy ákiminiń orynbasary ákimdik basshylaryna jeke kúzet bólinbegenin aıtty.
«Zardap shekken ákim orynbasary Berdenovte de, basqa ákimdik basshylarynda da jeke kúzet joq. Tipti qala ákimi Ǵabıt Ábdimajıtovtyń ózi de kúzetsiz júredi. Biz qarapaıym halyqpen erkin aralasamyz, ashyq jumys isteımiz. Bul sizderge de belgili jaıt», – dedi Quranbek.
Sársen Quranbek oqıǵanyń sebepteri týraly túrli alyp-qashpa áńgimelerge emes, tek resmı málimetterge senýge shaqyrdy.
«Shabýyldyń sebepteri týraly túrli qaýesetter taraýda. Bul aqparattar shyndyqqa janaspaıdy. Tergeý qorytyndysy ǵana shyndyqty anyqtaıdy. Múmkin, shabýyl jasaýshy psıhıkalyq aýytqýǵa ushyraǵan ne psıhotroptyq zattardyń áserinde bolǵan shyǵar – biz naqty aıta almaımyz», – dedi ol.
Eske sala keteıik, 21 sáýir kúni keshke Shymkent qalalyq ákimdigi ǵımaratynyń mańynda Rýslan Berdenovke oq atylǵan edi. Ol jaraqat alyp, aýrýhanaǵa jetkizildi, qazirgi tańda em qabyldaýda. Al kúdikti ustalyp, qylmystyq is qozǵaldy.
