تۆەر قالاسىندا وتكەن قازاقستان مەن رەسەيدىڭ پارلامەنتتىك كوميسسياسىنىڭ 23-وتىرىسىندا «روسكوسموس» باس ديرەكتورى دميتري باكانوۆ قازاقستان تاراپىمەن بىرلەسە وتىرىپ، گاگارين ستارتى الاڭىندا مۋزەي كەشەنىن قۇرۋ جانە ونى يۋنەسكو-نىڭ بۇكىلالەمدىك مۇرالار تىزىمىنە ەنگىزۋ باستاماسى جۇزەگە اسىرىلاتىنىن ايتتى، دەپ حابارلايدى "ادىرنا" ۇلتتىق پورتالى.
ايتا كەتەيىك، گاگارين ستارتى – عارىش تاريحىنداعى ەڭ ماڭىزدى ورىنداردىڭ ءبىرى. ءدال وسى الاڭنان العاش رەت جەردىڭ جاساندى سەرىگى ۇشىرىلعان جانە ادامزات تاريحىنداعى تۇڭعىش عارىشكەر يۋري گاگارين عارىشقا اتتانعان.
باكانوۆتىڭ ايتۋىنشا، بۇل باستاما تەك تاريحي ماڭىزى بار جوبانى ساقتاۋ ءۇشىن عانا ەمەس، سونىمەن بىرگە عارىشتىق ءتۋريزمدى دامىتۋ ماقساتىندا قولعا الىنعان. بۇعان دالەل – ءساۋىر ايىندا «سويۋز مس-27» كەمەسىنىڭ ۇشىرىلىمى كەزىندە بايقوڭىرعا شامامەن 3000 تۋريست كەلگەن. ولار ارنايى تۋر اياسىندا گاگارين ستارتىنا، ياعني ادام بالاسى العاش عارىشقا اتتانعان تاريحي الاڭعا بارىپ قايتتى.
قازىرگى تاڭدا بايقوڭىردا رەسەيدىڭ «روسكوسموس» كورپوراتسياسىنا قاراستى 22 فيليال مەن وكىلدىك جۇمىس ىستەپ تۇر. بۇل عارىش ايلاعى — رەسەيدىڭ پيلوتتى باعدارلامالارى ورىندالاتىن جالعىز الاڭى.
سونىمەن قاتار تاراپتار بايقوڭىرداعى ينفراقۇرىلىمدى جاڭارتۋ، ينۆەستيتسيالىق تارتىمدىلىعىن ارتتىرۋ، جاستاردى عارىش سالاسىنا تارتۋ جانە كوسموناۆتيكانى تانىمال ەتۋ ماقساتىندا ءتۋريزمدى دامىتۋ باعىتىندا بىرلەسىپ جۇمىس ىستەيتىندەرىن مالىمدەدى.
ەسكە سالا كەتەيىك، بۇعان دەيىن گاگارين ستارت الاڭىنىڭ ورنىنان كونە وركەنيەت وشاعى تابىلعانى تۋرالى جازعان ەدىك.