قازاقستان رەسپۋبليكاسى اقپارات جانە قوعامدىق دامۋ ءمينيسترى ايدا بالاەۆا بەلگىلى جازۋشى اكىم ءتارازيدىڭ قايتىس بولۋىنا بايلانىستى جاقىندارىنا كوڭىل ايتتى، دەپ حابارلايدى “ادىرنا” ۇلتتىق پورتالى.
“قازاق ادەبيەتىنىڭ الىپ بايتەرەگى، ۇلاعاتتى عۇمىرىن ۇلت ادەبيەتىنە ارناعان كورنەكتى قالامگەر اكىم ءتارازيدىڭ دۇنيەدەن وزۋىنا بايلانىستى بارشا الاش جۇرتىنا قايعىرا كوڭىل ايتامىن.
اكىم اعامىز توقساننىڭ تورىنە شىعىپ، ومىرشەڭ شىعارمالارىمەن قالىڭ قازاقتىڭ قادىرلىسىنە اينالعان، ادامي قاسيەتى، پاراساتى بيىك ارداقتى ازامات ەدى. قازاق پروزاسىنىڭ كوكجيەگىن كەڭەيتىپ، كوركەم ادەبيەتتىڭ كورنەكتى تۋىندىلارىن دۇنيەگە اكەلگەن ءبىرتۋار تۇلعا ونەگەلى ءومىر جولى ارقىلى ۇلت رۋحانياتىنا سۇبەلى ۇلەس قوستى.
قالامگەردىڭ جارقىن بەينەسى، ارتىندا قالعان مول مۇراسى حالىق جادىندا ماڭگى ساقتالادى دەپ سەنەمىز. مارقۇمنىڭ تۋعان-تۋىستارىنا، جاقىندارى مەن ۇرپاقتارىنا، بارشا قالامداس ارىپتەستەرى مەن وقىرماندارىنا، اياۋلى جارى روزا اپامىزعا قايعىرا كوڭىل ايتامىن. اللانىڭ راقىمى مەن مەيىرىمى جولداس بولىپ، جاتقان جەرى جايلى، توپىراعى تورقا بولسىن”، دەدى ايدا بالاەۆا.
