الماتى قالاسىندا مادەنيەت جانە ونەر قايراتكەرلەرىمەن وتكەن كەزدەسۋدە قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى، «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ مۇشەسى ايدا بالاەۆا جاڭا كونستيتۋتسيا جوباسىنىڭ ءمان-ماڭىزىنا توقتالىپ، بۇل قۇجات ەلدىڭ بولاشاعىن ايقىندايتىن تاريحي شەشىم ەكەنىن اتاپ ءوتتى.
ۆيتسە-پرەمەردىڭ ايتۋىنشا، جاڭا كونستيتۋتسيا جوباسىنىڭ باستى وزەگى – ازاماتتاردىڭ يگىلىگى مەن ەلدىڭ تۇراقتى دامۋى.
«جاڭا كونستيتۋتسيا جوباسىنىڭ ەڭ باستى وزەگى – ازاماتتاردىڭ يگىلىگى، ەلدىڭ تۇراقتى دامۋىنا نەگىزدەلۋى. جاڭا پرەامبۋلادا ادام قۇقىقتارى مەن بوستاندىقتارى العاش رەت مەملەكەتتىڭ ەڭ جوعارى باسىمدىعى رەتىندە ايقىن بەلگىلەندى»، – دەدى ايدا بالاەۆا.
ونىڭ سوزىنشە، جاڭا رەداكتسيادا بىرلىك پەن ىنتىماقتاستىق، ۇلتارالىق جانە دىنارالىق كەلىسىم قازاقستان مەملەكەتتىلىگىنىڭ بەرىك ىرگەتاسى رەتىندە بەكىتىلگەن. ەگەمەندىك پەن تاۋەلسىزدىك، ەلدىڭ اۋماقتىق تۇتاستىعى وزگەرمەيتىن قۇندىلىقتار ساناتىنا ەنگىزىلگەن.
سونىمەن قاتار، كواليتسيا مۇشەلەرى – قر پارلامەنتى ءماجىلىسىنىڭ دەپۋتاتى امانجول ءالتاي، قازاقستان جازۋشىلار وداعىنىڭ توراعاسى مەرەكە قۇلكەنوۆ، حالىقارالىق «قازاق ءتىلى» قوعامى» قوعامدىق بىرلەستىگىنىڭ پرەزيدەنتى راۋان كەنجەحان ءوز سوزدەرىندە ادىلەتتىلىك، زاڭ مەن ءتارتىپ، تابيعاتقا جاۋاپكەرشىلىكپەن قاراۋ قاعيداتتارى العاش رەت نەگىزگى زاڭ دەڭگەيىندە ايقىندالىپ وتىرعانىن اتاپ ءوتتى. بۇل قوعامداعى ادىلدىك پەن ءتارتىپتى نىعايتىپ قانا قويماي، كەلەر ۇرپاق الدىنداعى ەكولوگيالىق جاۋاپكەرشىلىكتى دە زاڭدىق تۇرعىدا بەكىتەتىنىن جەتكىزدى.
ءوز كەزەگىندە ۆيتسە-پرەمەر جاڭا اتا زاڭنىڭ بۇكىل قوعام ءۇشىن ورتاق جاۋاپكەرشىلىك ەكەنىن ەرەكشە اتاپ ءوتتى.
«جاڭا اتا زاڭنىڭ تاعدىرى تەك زاڭگەرلەر مەن ساياساتكەرلەردىڭ عانا ەمەس، بۇكىل قوعامنىڭ ورتاق ءىسى. اسىرەسە مادەنيەت پەن ونەر سالاسىنىڭ وكىلدەرى ءۇشىن بۇل قۇجاتتىڭ ءمانى تەرەڭ»، – دەدى ول.
كەزدەسۋدە جاڭا كونستيتۋتسيا جوباسىندا مادەنيەت، عىلىم مەن ءبىلىمدى دامىتۋعا ەرەكشە ءمان بەرىلگەنى ايتىلدى. العاش رەت «تاريحي-مادەني مۇرانى ساقتاۋ» مەن ء«تول مادەنيەتتى قولداۋ» نەگىزگى قاعيداتتار رەتىندە ايقىندالىپ وتىر. سونداي-اق ازاماتتاردىڭ تاريحي جانە مادەني مۇراعا ۇقىپتى قاراۋ مىندەتى بەكىتىلگەن.
مەملەكەت مادەني ارالۋاندىقتى، عىلىمي ىزدەنىستى جانە بىلىمگە نەگىزدەلگەن دامۋدى ستراتەگيالىق باسىمدىق رەتىندە بەلگىلەيدى. زياتكەرلىك مەنشىكتى قورعاۋ كونستيتۋتسيالىق دەڭگەيدە بەكىتىلىپ، شىعارماشىلىق ەركىندىك مازمۇندىق تۇرعىدان ناقتىلانعان.
بۇدان بولەك، العاش رەت ازاماتتاردىڭ قۇقىقتارىن تسيفرلىق ورتادا قورعاۋ تۋرالى نورما ەنگىزىلگەن. بۇل جاڭا تەحنولوگيالار داۋىرىندە ادامنىڭ جەكە دەرەكتەرى مەن قاۋىپسىزدىگىن قامتاماسىز ەتۋگە باعىتتالعان.
وتباسى ينستيتۋتىنا قاتىستى دا ناقتى نورما بەكىتىلگەن. كونستيتۋتسيادا نەكە ەر ادام مەن ايەل ادامنىڭ ەرىكتى تاڭداۋى مەن تەڭ قۇقىعىنا نەگىزدەلگەن وداق ەكەنى ايقىن كورسەتىلگەن.
جالپى العاندا، جاڭا كونستيتۋتسيا ادام قۇقىقتارىنا تۇبەگەيلى باعدارلانعان جانە جاڭا قوعامدىق كەلىسىمنىڭ بەرىك نەگىزىن قالىپتاستىرۋعا باعىتتالعان قۇجات رەتىندە ۇسىنىلىپ وتىر.
«بۇل رەفەرەندۋم – كەزەكتى ساياسي ناۋقان ەمەس، بولاشاعىمىزدىڭ باستى قۇقىقتىق كەپىلى. ونىڭ ساتىمەن ءوتۋى – ءسىز بەن بىزگە تىكەلەي بايلانىستى. سوندىقتان بارشاڭىزدى جاڭا كونستيتۋتسيانى قولداۋعا شاقىرامىن», – دەدى ايدا بالاەۆا.
كەزدەسۋدە تەاتر جانە كينو اكتەرى، قازاقستاننىڭ حالىق ءارتىسى بولات ءابدىلمانوۆ، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ارمان جۇدەباەۆ، قازاقستان رەسپۋبليكاسى ۇلتتىق ورتالىق مۋزەيىنىڭ ديرەكتورى سەرجان ساروۆ جانە وزگە دە قاتىسۋشىلار جاڭا كونستيتۋتسيا جوباسىنا قاتىستى پىكىر ءبىلدىرىپ، سالانى ودان ءارى دامىتۋ باعىتىنداعى ۇسىنىستارىن ورتاعا سالدى. قاتىسۋشىلار ەلدىڭ بولاشاعى ءۇشىن جاۋاپتى تاڭداۋ جاساۋ قاجەتتىگىن اتاپ ءوتتى.
