الەۋمەتتىك جەلىدە اقتاۋداعى مەكتەپتەردىڭ بىرىندە 7-سىنىپ وقۋشىلارى ومىرگە قاۋىپتى "ويىنعا" قاتىسقانى تۋرالى ۆيدەو قىزۋ تالقىلانىپ جاتىر، دەپ حابارلايدى “ادىرنا” ۇلتتىق پورتالى.
كادرلاردان وقۋشى قىزدىڭ الدىمەن جابىرلەنۋشىنى شاپالاقپەن ۇرعانىن كورۋگە بولادى. سوسىن ونى تۇنشىقتىرىپ، كەۋدەسىن باسقان. ارتىنشا قىز ەسىن جوعالتىپ، ەدەنگە قۇلاعان.
مالىمەتتەرگە سەنسەك، وقيعا 8 ساۋىردە №33 مەكتەپتە بولعان. زارداپ شەگۋشى جەتىنشى سىنىپ وقۋشىسى. وقۋشىلار تۋرالى اقپارات كامەلەتكە تولماعاندار ءىسى جونىندەگى ينسپەكتورعا بەرىلىپتى.
ماڭعىستاۋ وبلىستىق ءبىلىم باسقارماسى قىزدار "يتتىڭ ءلاززاتى" دەپ اتالاتىن قاۋىپتى ويىن ويناعانىن ايتتى. بۇل – ميعا وتتەگىنىڭ جەتۋىن ادەيى شەكتەۋ ارقىلى ەيفوريالىق كۇيگە ەنۋگە تىرىساتىن وتە قاۋىپتى ارەكەت ەكەن. مۇنداي "ويىندار" ميعا زاقىم كەلتىرىپ، ولىمگە اكەلۋى مۇمكىن.
"قازىردىڭ وزىندە مەكتەپ پسيحولوگتارىنىڭ قاتىسۋىمەن وقۋشىلار مەن ولاردىڭ اتا-انالارىمەن ءتۇسىندىرۋ جۇمىستارى باستالدى. بۇل ءىس اقتاۋ قالالىق كامەلەتكە تولماعاندار ءىسى جونىندەگى كوميسسيادا قارالادى. سونىمەن قاتار مەكتەپ ديرەكتورى تارتىپتىك جاۋاپقا تارتىلدى", – دەلىنگەن ءبىلىم باسقارماسىنىڭ حابارلاماسىندا.
ماماندار مەن جەرگىلىكتى بيلىك اتا-انالار مەن مۇعالىمدەردى بالالارمەن اشىق سويلەسىپ، مۇنداي قاۋىپتى ارەكەتتەردىڭ سالدارى تۋرالى تۇسىندىرۋگە شاقىرادى.
