2023 جىلى باكۋ – تبيليسي – جەيحان مۇناي قۇبىرى باعىتى بويىنشا مۇناي ەكسپورتىنىڭ كولەمى 1 ميلليون 392 مىڭ تونناعا دەيىن ۇلعايتىلدى، دەپ حابارلايدى ”ادىرنا” ۇلتتىق پورتالى “قازمۇنايگاز” ۇلتتىق كومپانياسىنىڭ ءباسپاسوز قىزمەتىنە سىلتەمە جاساپ.
“قازترانسويل” اق (“قازمۇنايگاز” ۇك اق ەنشىلەس ۇيىمى) 2023 جىلدىڭ 12 ايىندا اقتاۋ پورتىنان 3 ملن 376 مىڭ توننا قازاقستاندىق مۇناي ەكسپورتتادى، بۇل 2022 جىلدىڭ سايكەس كەزەڭىمەن سالىستىرعاندا 1 ملن 108 مىڭ تونناعا ارتىق.
اقتاۋ پورتىنان ەكسپورتقا قازاقستاندىق مۇنايدى تاسىمالداۋ كولەمىنىڭ ۇلعايۋى "باكۋ – تبيليسي – جەيحان" مۇناي قۇبىرى باعىتىندا جونەلتىلەتىن شيكىزات كولەمىنىڭ 250 مىڭ توننادان 1 ملن 392 مىڭ تونناعا دەيىن وسۋىنە بايلانىستى، بۇل 2022 جىلدىڭ ۇقساس كەزەڭىمەن سالىستىرعاندا 5,5 ەسە كوپ.
اتاپ ايتقاندا، بۇل باعىتتا تەڭىز كەنىشىنەن 1 ميلليون 57 مىڭ توننا مۇناي جونەلتىلدى. سونىمەن قاتار، ەسەپتى كەزەڭدە اقتاۋ پورتىنان ماحاچكالا پورتىنا قاراي 1 ملن 984 مىڭ توننا مۇناي جونەلتىلدى.
ايتا كەتەيىك، قازاقستاننىڭ نەگىزگى مۇناي ەكسپورتى رەسەيدى باسىپ وتەتىن كاسپي قۇبىر جەلىسى ارقىلى جۇزەگە اسادى. ال قازاقستان 2023 جالپى كولەمى 63,4 ملن توننا مۇناي ەكسپورتتاعان.
”ادىرنا” ۇلتتىق پورتالى
