اقتاۋدا ەر ادام وتباسىن اسىراۋ ءۇشىن ون قاباتتى ءۇيدىڭ شاتارىنا تاۋىق قورا سالعان، دەپ حابارلايدى “ادىرنا” ۇلتتىق پورتالى لادا.كز سايتىنا سىلتەمە جاساپ.
تاۋىق قورا سالۋ يدەياسى رۋسلانعا ءبىر اي بۇرىن ويىنا كەلگەن. ونىڭ سەبەبى – ازىق-تۇلىكتىڭ قىمباتتاۋى بولدى. 12-ىقشاماۋداندا ورنالاسقان ءۇيدىڭ شاتىرىنىڭ كىلتىن وعان پاتەر يەلەرىنىڭ كووپەراتيۆى بەرگەن. ول ەندى تەك قۇستاردى عانا ەمەس قوياندارى دا اسىراپ وتىر.
"توبەدە قوقىس، قاجەتسىز زاتتار جاتتى. ءبارىن رەتتەدىم، ەدەن قۇيىپ، بۇل جەردى جىلىتتىم", – دەدى ول.
باستاپقىدا كەيبىر تۇرعىندار تاماق قالدىقتارىن اكەلىپ كومەكتەسكەن. الايدا 10 قاراشا، سارسەنبىدە ەر ادامعا پوليتسيا كەلدى. كورشىلەرى تۇنگى ۋاقىتتاعى دىبىستارعا، جاعىمسىز يىسكە شاعىمدانعان.
پوليتسيا قر اقبتك-ءنىڭ 408-بابى ("اۋىل شارۋاشىلىعى جانۋارلارىن جايۋ ەرەجەلەرىن، يتتەر مەن مىسىقتاردى اسىراۋ جانە سەرۋەندەتۋ ەرەجەلەرىن، قاڭعىباس يتتەر مەن مىسىقتاردى اۋلاۋ جانە جويۋ ەرەجەلەرىن بۇزۋ") جانە قر اقبتك-ءنىڭ 505-بابى ("قالالار مەن ەلدى مەكەندەردىڭ اۋماقتارىن اباتتاندىرۋ ەرەجەلەرىن بۇزۋ، سونداي-اق قالا مەن ەلدى مەكەندەردىڭ ينفراقۇرىلىم وبەكتىلەرىن بۇزۋ، جاسىل ەكپەلەرىن جويۋ جانە ءبۇلدىرۋ") بويىنشا اكىمشىلىك حاتتاما تولتىردى.
“ادىرنا” ۇلتتىق پورتالى
