شىمكەنتتە ۇلى جەڭىستىڭ 80 جىلدىعىنا وراي بىرقاتار ءىس-شارالار ءوتتى. ماسەلەن «ەرلىككە تاعزىم» اكتسياسى اياسىندا قالا اۋماعىنداعى ۇلى وتان سوعىسى باتىرلارىنىڭ ەسكەرتكىشتەرى مەن مەموريالدارى تازالانىپ، جوندەلىپ، اينالاسى اباتتاندىرىلدى. ونىڭ ىشىندە اباي ساياباعىنداعى «داڭق» مەموريالى، «جەڭىس» ساياباعىنداعى گەنەرال سابىر راحىموۆتىڭ ەسكەرتكىشى، سونداي-اق، داڭقتى قولباسشى باۋىرجان مومىشۇلىنىڭ، قازاقتىڭ باتىر قىزى ءاليا مولداعۇلوۆانىڭ جانە وزگە دە ەسكەرتكىشتەردىڭ اينالاسى تازالانىپ، اباتتاندىرىلدى.
– بۇگىن ءبىز قالامىزداعى اباي ساياباعىنىڭ اۋماعىندا ورنالاسقان «داڭق» مەموريالىنىڭ اينالاسىن تازالاپ، رەتكە كەلتىرىپ، وسى اۋماقتى اباتتاندىرىپ جاتىرمىز. بۇل – ءبىزدىڭ ۇلى وتان سوعىسىندا وتانىن قورعاۋ جولىندا قۇربان بولعان باتىر بابالارىمىزدىڭ رۋحىنا جاساعان تاعزىمىمىز. جالپى، ۇلى جەڭىستىڭ 80 جىلدىعىن كەڭ كولەمدە اتاپ ءوتۋ ارقىلى جاس ۇرپاقتىڭ بويىنا وتانسۇيگىشتىك قاسيەتتى سىڭىرە الامىز، – دەيدى اكتسياعا ۇلەس قوسقان ەرىكتى جاس اراي ءالىم.
ايتا كەتەيىك، شىمكەنت قالاسىنداعى «داڭق» مەموريالىندا ەلىمىزدىڭ وڭتۇستىك وڭىرىنەن مايدانعان اتتانعان 140 مىڭنان استام ارداگەردىڭ ەسىمى جازىلعان.
سونىمەن قاتار «ارداعىم ارداگەرىم» اكتسياسى اياسىندا قالا جاستارى ۇلى وتان سوعىسىنىڭ ارداگەرلەرى مەن تىل ەڭبەككەرلەرىنىڭ ۇيىنە باردى. جاستار ارداگەرلەردىڭ ءۇي شارۋاسىنا كومەكتەسىپ، ازىق-تۇلىك پەن ءدارى-دارمەك ساتىپ اپەردى. وتانىن قورعاۋ جولىندا باسىن بايگەگە تىككەن ارداگەرلەرگە قۇرمەت كورسەتىپ، العىسىن ءبىلدىردى.
اتاپ ايتقاندا، سوعىس ارداگەرى نينا موسۋنوۆانىڭ ۇيىنە شىمكەنت قالالىق دەنساۋلىق ساقتاۋ باسقارماسى باسشىسىنىڭ ورىنباسارى باقىتجان ابدۋللاەۆ باستاعان دارىگەرلەر مەن جاستار باردى.
– ءبىز بۇگىنگى بەيبىت ءومىرىمىز بەن اسپانىمىزدىڭ اشىق بولعانى ءۇشىن ۇلى وتان سوعىسى ارداگەرلەرىنە، قان مايداندا ەرلىك كورسەتكەن اتا-اجەلەرىمىزگە قارىزدارمىز. سوندىقتان ارداگەرلەردى ارداقتاۋ بۇكىل قوعامعا ورتاق مىندەت دەپ ويلايمىن. بۇگىن ءبىز شىمكەنت قالاسىنىڭ تۇرعىنى، سوعىس ارداگەرى نينا ەگوروۆنانىڭ ۇيىنە كەلىپ، ول كىسىنىڭ دەنساۋلىعىن تەكسەرۋدەن وتكىزىپ، ماماندارىمىز دارىگەرلىك كەڭەس بەردى. ارداگەرلەرىمىز ءاردايىم امان بولسىن، – دەيدى ب.ابدۋللاەۆ.
ال، تىل ارداگەرى كلاۆديا پانكينانىڭ ۇيىنە ءال-فارابي اۋدانى اكىمدىگىنىڭ قىزمەتكەرلەرى مەن جاستار باردى. ولار ارداگەر اجەيگە ءۇي شارۋاسى بويىنشا كومەكتەسىپ، جىلى سوزدەرىن ايتىپ، كوڭىل كوتەردى.
– تىل ارداگەرلەرى مايدانگەرلەرمەن قاتار سۇراپىل سوعىستىڭ بارلىق اۋىرتپالىعىن كوتەردى. ايەلدەر مەن بالالار وتە اۋىر جاعدايلاردا ەڭبەك ەتكەنىن، ءسويتىپ، جەڭىسكە لايىقتى ۇلەس قوسقانىن تاريحتان جاقسى بىلەمىز. بۇگىن سول تىل ارداگەرلەرىنىڭ ءبىرى – كلاۆديا ستەپانوۆنانىڭ ۇيىنە كەلىپ، ول كىسىگە سىي-سياپات جاساپ، ءۇي شارۋاسىنا كومەكتەسىپ، بارلىق قۇرمەتىمىزدى كورسەتىپ جاتىرمىز، – دەيدى ءال-فارابي اۋدانىنى اكىمدىگىنىڭ ءبولىم باسشىسى قادىرحان ارىسبەكوۆ.
ودان بولەك، شىمكەنت قالاسىندا #باتىردىڭ ۇرپاعىمىز اتتى چەلەندج وتكىزىلدى. چەللەندجدە الەۋمەتتىك جەلىلەردە جاستاردىڭ باستاماسىمەن ۇلى وتان سوعىسى كەزىندەگى اتا-بابالارىنىڭ ەرلىكتەرىن باياندايتىن جازبالار ۇيىمداستىرىلدى. قالا جاستارى ارداگەرلەردىڭ سۇراپىل سوعىستاعى كوزسىز ەرلىكتەرى مەن جانقيارلىقتارىن اتاپ ءوتىپ، بۇگىنگى بەيبىتشىلىك پەن تۇراقتىلىقتى سىيلاعاندىقتارى ءۇشىن ءوز العىستارىن ءبىلدىردى.
سونىمەن قاتار، قالاداعى بارلىق ءبىلىم بەرۋ ۇيىمدارى مەن كوللەدجدەردە «ەر ەسىمى – ەل ەسىندە» اتتى وقۋشىلار مەن ستۋدەنتتەرگە ارنالعان سىنىپ ساعاتتارى ءوتتى.
ونىڭ ماقساتى - وسكەلەڭ ۇرپاققا قازاقستاندىقتاردىڭ ەرلىكتەرىن قۇرمەتتەۋگە جانە پاتريوتيزمگە تاربيەلەۋ. بۇل كۇنى وقۋشىلار مەن ستۋدەنتتەر اراسىندا سىنىپ ساعاتتارى، تاريح ساعاتتارى، تاقىرىپتىق كورمەلەر، سۋرەت جانە قولونەر بايقاۋلارى، سونداي-اق، باسقا دا شىعارماشىلىق جانە تانىمدىق ءىس-شارالار وتكىزىلدى.
اتالعان ءىس-شارالارمەن قاتار، ۇلى وتان سوعىسىنىڭ ارداگەرلەرىنە قامقورلىق جاساۋ، ولاردىڭ دەنساۋلىعىن ساقتاۋ ماقساتىندا ءتيىستى قولداۋ كورسەتۋ ءۇشىن ۇلى وتان سوعىسىنىڭ ارداگەرلەرىنە، تىل ەڭبەككەرلەرىنە كەزەكتەن تىس مەديتسينالىق تەكسەرۋلەر، ۇيلەرىندە تەكسەرۋلەر جۇرگىزۋ، جەڭىلدىكتى دارىلىك زاتتارمەن قامتاماسىز ەتۋ، ۇيدە نەمەسە ستاتسيونارلاردا تەگىن ەمدەۋ شارالارى ۇيىمداستىرىلدى.
شىمكەنت قالاسىنىڭ اكىمدىگىمەن جەڭىستىڭ 80 جىلدىعىن اتاپ ءوتۋ جونىندەگى جوسپارعا سايكەس ءتيىستى جۇمىستار قارقىندى جۇرگىزىلۋدە. جەڭىس كۇنىنە وراي 9 مامىر كۇنى «داڭق» مەموريالىندا ارنايى مەرەكەلىك ءىس-شارالار وتكىزۋ جوسپارلانۋدا.
