Şymkentte Ūly Jeŋıstıŋ 80 jyldyǧyna orai bırqatar ıs-şaralar öttı. Mäselen «Erlıkke taǧzym» aksiiasy aiasynda qala aumaǧyndaǧy Ūly Otan soǧysy batyrlarynyŋ eskertkışterı men memorialdary tazalanyp, jöndelıp, ainalasy abattandyryldy. Onyŋ ışınde Abai saiabaǧyndaǧy «Daŋq» memorialy, «Jeŋıs» saiabaǧyndaǧy general Sabyr Rahymovtyŋ eskertkışı, sondai-aq, daŋqty qolbasşy Bauyrjan Momyşūlynyŋ, qazaqtyŋ batyr qyzy Äliia Moldaǧūlovanyŋ jäne özge de eskertkışterdıŋ ainalasy tazalanyp, abattandyryldy.
– Bügın bız qalamyzdaǧy Abai saiabaǧynyŋ aumaǧynda ornalasqan «Daŋq» memorialynyŋ ainalasyn tazalap, retke keltırıp, osy aumaqty abattandyryp jatyrmyz. Būl – bızdıŋ Ūly Otan soǧysynda Otanyn qorǧau jolynda qūrban bolǧan batyr babalarymyzdyŋ ruhyna jasaǧan taǧzymymyz. Jalpy, Ūly Jeŋıstıŋ 80 jyldyǧyn keŋ kölemde atap ötu arqyly jas ūrpaqtyŋ boiyna otansüigıştık qasiettı sıŋıre alamyz, – deidı aksiiaǧa üles qosqan erıktı jas Arai Älım.
Aita keteiık, Şymkent qalasyndaǧy «Daŋq» memorialynda elımızdıŋ oŋtüstık öŋırınen maidanǧan attanǧan 140 myŋnan astam ardagerdıŋ esımı jazylǧan.
Sonymen qatar «Ardaǧym ardagerım» aksiiasy aiasynda qala jastary Ūly Otan soǧysynyŋ ardagerlerı men tyl eŋbekkerlerınıŋ üiıne bardy. Jastar ardagerlerdıŋ üi şaruasyna kömektesıp, azyq-tülık pen därı-därmek satyp äperdı. Otanyn qorǧau jolynda basyn bäigege tıkken ardagerlerge qūrmet körsetıp, alǧysyn bıldırdı.
Atap aitqanda, soǧys ardagerı Nina Mosunovanyŋ üiıne Şymkent qalalyq densaulyq saqtau basqarmasy basşysynyŋ orynbasary Baqytjan Abdullaev bastaǧan därıgerler men jastar bardy.
– Bız bügıngı beibıt ömırımız ben aspanymyzdyŋ aşyq bolǧany üşın Ūly Otan soǧysy ardagerlerıne, qan maidanda erlık körsetken ata-äjelerımızge qaryzdarmyz. Sondyqtan ardagerlerdı ardaqtau bükıl qoǧamǧa ortaq mındet dep oilaimyn. Bügın bız Şymkent qalasynyŋ tūrǧyny, soǧys ardagerı Nina Egorovnanyŋ üiıne kelıp, ol kısınıŋ densaulyǧyn tekseruden ötkızıp, mamandarymyz därıgerlık keŋes berdı. Ardagerlerımız ärdaiym aman bolsyn, – deidı B.Abdullaev.
Al, tyl ardagerı Klavdiia Pankinanyŋ üiıne Äl-Farabi audany äkımdıgınıŋ qyzmetkerlerı men jastar bardy. Olar ardager äjeige üi şaruasy boiynşa kömektesıp, jyly sözderın aityp, köŋıl köterdı.
– Tyl ardagerlerı maidangerlermen qatar sūrapyl soǧystyŋ barlyq auyrtpalyǧyn köterdı. Äielder men balalar öte auyr jaǧdailarda eŋbek etkenın, söitıp, Jeŋıske laiyqty üles qosqanyn tarihtan jaqsy bılemız. Bügın sol tyl ardagerlerınıŋ bırı – Klavdiia Stepanovnanyŋ üiıne kelıp, ol kısıge syi-siiapat jasap, üi şaruasyna kömektesıp, barlyq qūrmetımızdı körsetıp jatyrmyz, – deidı Äl-Farabi audanyny äkımdıgınıŋ bölım basşysy Qadyrhan Arysbekov.
Odan bölek, Şymkent qalasynda #Batyrdyŋ ūrpaǧymyz atty chelendj ötkızıldı. Chellendjde äleumettık jelılerde jastardyŋ bastamasymen Ūly Otan soǧysy kezındegı ata-babalarynyŋ erlıkterın baiandaityn jazbalar ūiymdastyryldy. Qala jastary ardagerlerdıŋ sūrapyl soǧystaǧy közsız erlıkterı men janqiiarlyqtaryn atap ötıp, bügıngı beibıtşılık pen tūraqtylyqty syilaǧandyqtary üşın öz alǧystaryn bıldırdı.
Sonymen qatar, qaladaǧy barlyq bılım beru ūiymdary men kolledjderde «Er esımı – el esınde» atty oquşylar men studentterge arnalǧan synyp saǧattary öttı.
Onyŋ maqsaty - öskeleŋ ūrpaqqa qazaqstandyqtardyŋ erlıkterın qūrmetteuge jäne patriotizmge tärbieleu. Būl künı oquşylar men studentter arasynda synyp saǧattary, tarih saǧattary, taqyryptyq körmeler, suret jäne qolöner baiqaulary, sondai-aq, basqa da şyǧarmaşylyq jäne tanymdyq ıs-şaralar ötkızıldı. Atalǧan ıs-şaralarmen qatar, Ūly Otan soǧysynyŋ ardagerlerıne qamqorlyq jasau, olardyŋ densaulyǧyn saqtau maqsatynda tiıstı qoldau körsetu üşın Ūly Otan soǧysynyŋ ardagerlerıne, tyl eŋbekkerlerıne kezekten tys medisinalyq tekseruler, üilerınde tekseruler jürgızu, jeŋıldıktı därılık zattarmen qamtamasyz etu, üide nemese stasionarlarda tegın emdeu şaralary ūiymdastyryldy.
Şymkent qalasynyŋ äkımdıgımen Jeŋıstıŋ 80 jyldyǧyn atap ötu jönındegı josparǧa säikes tiıstı jūmystar qarqyndy jürgızılude. Jeŋıs künıne orai 9 mamyr künı «Daŋq» memorialynda arnaiy merekelık ıs-şaralar ötkızu josparlanuda.
