تۋريزم جانە سپورت ءمينيسترى ەربول مىرزابوسىنوۆ الماتى قالاسىندا وتكەن جارتىلاي مارافون كەزىندە بولعان قايعىلى جاعدايعا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
ءمينيستردىڭ ايتۋىنشا، قازىرگى ۋاقىتتا وقيعاعا بايلانىستى تولىققاندى تەكسەرىس جۇرگىزىلىپ جاتىر.
«قاتىسۋشىلاردىڭ دەنساۋلىق جاعدايى، جارىستى ۇيىمداستىرۋ ءتارتىبى، مەديتسينالىق قامتاماسىز ەتۋ دەڭگەيى مەن قاۋىپسىزدىك رەگلامەنتى جان-جاقتى ساراپتالادى. جەرگىلىكتى اتقارۋشى ورگاندار وتكىزەتىن مۇنداي شارالارعا تالاپتى كۇشەيتەمىز. بۇقارالىق سپورت قاۋىپسىز ءارى كاسىبي دەڭگەيدە ۇيىمداستىرىلۋى ءتيىس. تۋريزم جانە سپورت مينيسترلىگى بۇل باعىتتا ناقتى ۇسىنىستار ازىرلەپ، ءتيىستى قۇرىلىمدارعا جولدايدى. قازا بولعان ازاماتتاردىڭ جاقىندارىنا كوڭىل ايتامىن!»—دەدى ول الەۋمەتتىك جەلىدەگى پاراقشاسىندا.
ەسكە سالا كەتەيىك، 20 ساۋىردە الماتىدا جارتىلاي مارافون ءوتىپ، جارىس بارىسىندا 84 جاستاعى اققويان رساليەۆ پەن 21 جاستاعى نۇربول احمادي كوز جۇمعان ەدى.
