جامبىل وبلىسىندا 3, 5 جانە 7 جاستاعى اپكەلى-سىڭىلىلەر گازدان ۋلانىپ، ءوز ۇيلەرىندە قازا تاپتى، دەپ حابارلايدى “ادىرنا” ۇلتتىق پورتالى.
الەۋمەتتىك جەلىلەردە حابارلانعانداي، قايعىلى وقيعا 19 ءساۋىر كۇنى كەشكە سارمولداەۆ اۋىلىندا بولعان.
«الدىن الا مالىمەت بويىنشا، تاڭەرتەڭ اناسى بالالاردى ۇيدە جالعىز قالدىرىپ، شارۋالارىمەن كەتكەن. قايتىپ كەلگەن كەزدە ءۇيدىڭ ىشىندە گازدىڭ وتكىر ءيىسى سەزىلگەن. قىزدار ەس-ءتۇسسىز جاتقان. ايەل دەرەۋ بالالاردى اۋرۋحاناعا جەتكىزگەن، الايدا، وكىنىشكە قاراي، ولاردى امان الىپ قالۋ مۇمكىن بولمادى — قىزدار ەسىن جيماستان جانساقتاۋ بولىمىندە كوز جۇمعان»، – دەلىنگەن Instagram-دا تارالعان حابارلامادا.
جامبىل وبلىستىق پوليتسيا دەپارتامەنتىنىڭ ءباسپاسوز قىزمەتى بۇل قايعىلى جاعدايدى راستادى.
«مەركى اۋدانىنداعى تۇرعىن ۇيدە ءۇش بالانىڭ تابيعي گازدان ۋلانۋ سالدارىنان قازا بولۋىنا بايلانىستى قىلمىستىق ءىس قوزعالىپ، سوتقا دەيىنگى تەرگەۋ باستالدى. قازىر وقيعانىڭ ءمان-جايى انىقتالىپ جاتىر، بىرقاتار ساراپتامالار تاعايىندالىپ، تەرگەۋ امالدارى جۇرگىزىلۋدە»، – دەپ حابارلادى دەپارتامەنت.
