«بۇل — ءبىزدىڭ ورتاق تاريحىمىز». قوشانوۆ توقاەۆتىڭ ماسكەۋگە ساپارى تۋرالى

3115
Adyrna.kz Telegram

ءماجىلىس سپيكەرى ەرلان قوشانوۆ مەملەكەت باسشىسى قاسىم-جومارت توقاەۆتىڭ رەسەيدەگى جەڭىس كۇنىنە وراي ۇيىمداستىرىلعان شەرۋگە بارۋىن بۇل ءبىزدىڭ ورتاق تاريحىمىز دەپ ءتۇسىندىردى، دەپ حابارلايدى "ادىرنا". 

10 مامىردا ءماجىلىس الاڭىندا جۋرناليستەر ەرلان قوشانوۆتان كۇردەلى گەوساياسي جاعدايدى ەسكەرە وتىرىپ، پرەزيدەنتتىڭ شەرۋگە نەگە بارعانىن سۇرادى.

"9 مامىر - مەرەكە، مەنىڭ ويىمشا، بۇل ءبىزدىڭ ورتاق تاريحىمىز. ءبىزدىڭ بارلىق باۋىرلاس مەملەكەتتەرىمىزدىڭ تاريحى. سوندىقتان پرەزيدەنتىمىز رەسەي پرەزيدەنتىنىڭ شاقىرۋىمەن باردى. ول جەڭىس شەرۋىنە قاتىستى. ءبىرىنشى كۇنى رجەۆ مەموريالىنا باردى. رجەۆسك قالاسىندا «ماسكەۋدى قورعاۋدا 22 مىڭنان استام قازاقتارىمىز، قازاق جاۋىنگەرلەرى قازا تاپتى. ول باتىرلارىمىزدىڭ رۋحىنا زيارات ەتىپ، رۋحىنا تاعزىم ەتتى»، دەدى قوشانوۆ.

ءماجىلىس سپيكەرى بۇل ساپاردى «دۇرىس، ويتكەنى ۇلى وتان سوعىسى مەن ۇلى جەڭىس – ءبىزدىڭ ورتاق تاريحىمىز» دەپ ەسەپتەيدى.

«سوندىقتان بۇل شەرۋدە بارلىق باۋىرلاس مەملەكەتتەردىڭ باسشىلارى بولدى.بۇل سوعىستا قازا تاپقان اتالارىمىزعا، اكەلەرىمىزگە دەگەن قۇرمەت دەپ ويلايمىن.بۇل ماسەلەنى ساياساتتاندىرۋعا بولمايدى دەپ ويلايمىن. قازاقستاننان 1 ملن 200 مىڭ ادام سوعىسقا كەتتى. ولاردىڭ جارتىسى قايتىپ ورالمادى. ولاردىڭ كوپشىلىگى رەسەيدە جەرلەنگەن»، دەپ قوستى ول.

پىكىرلەر